Pune Leopard: पुणे: गेल्या अनेक महिन्यांपासून पुणे शहरात जंगली प्राण्यांची दहशत वाढत चालली आहे. असातच सोमवारी सकाळी पहाटे बावधन परिसरात पुन्हा एकदा बिबट्या दिसल्याने स्थानिक नागरिकांमध्ये भीतीचे वातावरण निर्माण झाले आहे. हा बिबट्या बावधनमधील डी पॅलेस रेस्टोरंटजवळ एनडीए रोडवर दिसला.
घटनेची माहिती मिळताच स्थानिक रहिवाशांनी तात्काळ वन विभागाला माहिती दिली. त्यानंतर महाराष्ट्र वनविभागाचे अधिकारी तत्काळ घटनास्थळी दाखल झाले. घटनास्थळी बिबट्याचा शोध सुरु आहे. मात्र, बिबट्या अद्याप पकडला गेलेला नाही.
घटनास्थळी बिबट्या वावरताना एक व्हिडिओ सोशल मीडियावर वेगाने व्हायरल होत आहे. बावधन परिसरात नागरिकांमध्ये भीतीचे वातावरण निर्माण झाले आहे. या आधी बिबट्या लोहगाव, औंध आणि काही अन्य भागातही वावरताना दिसला.
शहरात बिबट्यांच्या वावराविषयी चर्चा आणि अफवांना उधाण आले आहे. काही एआय-जनरेटेड फोटो देखील फिरत असल्याने संभ्रम वाढल्याचे दिसते.
प्रशासनाने नागरिकांना आवाहन केले आहे. अशावेळी शांत राहण्याचे, घाबरून गर्दी न करण्याचे आणि बिबट्या दिसल्यास तात्काळ अधिकाऱ्यांना माहिती देण्याचे आवाहन केले आहे. दरम्यान, वन विभागाने परिसरात शोधमोहीम सुरु केली असून, बिबट्याला सुरक्षितरीत्या पकडण्यासाठी पिंजरे लावण्यात येत आहेत.
