इंदापूर, आदित्य बोराटे –
Pune : इंदापूर तालुक्यातील भिगवण येथे दि.१७ फेब्रुवारी रोजी घडलेल्या घटनेच्या निषेधार्थ सोमवारी (दि. २३) हिंदू समाजाच्या वतीने ‘इंदापूर तालुका बंद’ची हाक देण्यात आली होती. संबंधित घटनेतील आरोपींवर कठोर कारवाई करावी तसेच भविष्यात अशा घटना घडू नयेत यासाठी प्रतिबंधात्मक उपाययोजना कराव्यात, अशी मागणी निवेदनाद्वारे करण्यात आली होती. प्रशासनाने कायदा व सुव्यवस्था अबाधित ठेवण्यासाठी ठोस पावले उचलावीत, अन्यथा तीव्र आंदोलनाचा इशाराही देण्यात आला होता.
या पार्श्वभूमीवर सोमवारी सकाळी ११ वाजेपर्यंत इंदापूर शहरातील बहुतांश दुकाने व दैनंदिन व्यवहार बंद ठेवण्यात आले होते. ११ नंतर मात्र सर्व व्यवहार सुरळीतपणे सुरू झाले. कोणताही अनुचित प्रकार घडू नये यासाठी शहरात पोलिसांकडून चोख बंदोबस्त ठेवण्यात आला होता. परिस्थिती शांततापूर्ण राहिल्याने नागरिकांनीही सहकार्याची भूमिका घेतली.
