Pune Election : पुणे आणि पिंपरी-चिंचवड महापालिका निवडणुकीत भाजप आणि अजित पवार यांच्या राष्ट्रवादी काँग्रेसची युती होणार की नाही, याकडे सगळ्यांचे लक्ष लागले होते. मात्र या दोन्ही महापालिकांमध्ये भाजप आणि राष्ट्रवादी वेगवेगळेच निवडणुकीला सामोरे जाणार असल्याचं मुख्यमंत्री देवेंद्र फडणवीस यांनी स्पष्ट केलं आहे. (pune election)
पुण्यात बोलताना फडणवीस म्हणाले की, आम्ही जर सगळे एकत्र लढलो तर त्याचा फायदा विरोधकांना होऊ शकतो. त्यामुळे पुणे आणि पिंपरी-चिंचवडमध्ये भाजप आणि राष्ट्रवादी एकमेकांविरोधात, पण मैत्रीपूर्ण पद्धतीने निवडणूक लढतील.
राज्य निवडणूक आयोगाने सोमवारी राज्यातील 29 महापालिकांच्या निवडणुकीचा कार्यक्रम जाहीर केला आहे. यामध्ये पुणे आणि पिंपरी-चिंचवड या दोन महापालिका भाजप आणि राष्ट्रवादीसाठी प्रतिष्ठेच्या ठरणार आहेत. या ठिकाणी अजित पवार विरुद्ध भाजप असं चित्र पाहायला मिळणार आहे.
फडणवीस म्हणाले की, 2017 मध्ये पुणे आणि पिंपरी-चिंचवडमध्ये अजित पवार यांना मोठा फटका बसला होता. आता 2026 मध्ये त्यांच्यासमोर पुन्हा ताकद दाखवण्याचं आव्हान आहे. आमच्या सरकारने केलेल्या कामामुळे या निवडणुकीत निकाल आमच्या बाजूने लागेल, असा विश्वास त्यांनी व्यक्त केला.
ते पुढे म्हणाले की, राज्यात काही ठिकाणी भाजप-शिवसेना युती असेल, काही ठिकाणी भाजप-शिवसेना-राष्ट्रवादी एकत्र लढेल. मात्र पुणे आणि पिंपरी-चिंचवडमध्ये राष्ट्रवादी ताकदवान असल्याने इथे मैत्रीपूर्ण लढत होणार आहे.
भाजपमध्ये येणाऱ्या नेत्यांबाबत विचारलं असता फडणवीस म्हणाले की, पक्षात येण्याचा ओघ आहे, पण कोणाला घ्यायचं आणि कोणाला नाही, हे पक्षाचे अध्यक्ष ठरवतील.
मुंबई महापालिकेबाबत बोलताना ते म्हणाले, दोन्ही ठाकरे एकत्र आले किंवा नाही आले, तरी मुंबईकर आमच्याच सोबत राहतील. यावेळी मुंबई महापालिका भाजपच जिंकेल, असा ठाम विश्वास त्यांनी व्यक्त केला.
