पुणे : पुणे रेल्वे स्थानक परिसरात एका प्रवाशाला बेदम मारहाण करून लुटल्याची खळबळजनक घटना समोर आली आहे. या प्रकरणामुळे स्थानकावरील प्रवाशांच्या सुरक्षेबाबत गंभीर प्रश्न निर्माण झाला आहे. याप्रकरणी पीडित तरुणाच्या तक्रारीवरून बंडगार्डन पोलीस ठाण्यात गुन्हा दाखल करण्यात आला असून पोलीस फरार आरोपींचा शोध घेत आहेत.
मूळचा तेलंगणाचा असलेला इरफान निजाम मोहम्मद (वय 27, सध्या रा. सुपा, ता. बारामती) हा तरुण शुक्रवारी (18 सप्टेंबर) सकाळी साडेनऊच्या सुमारास पुणे रेल्वे स्थानकातील पार्सल विभागाजवळ विश्रांती घेत बसला होता. याच दरम्यान तीन अज्ञात भामटे त्याच्याजवळ आले. त्यांनी काहीही कारण नसताना इरफानशी हुज्जत घालण्यास सुरुवात केली आणि पाहता पाहता वाद वाढवला.
आरोपींनी इरफानला धमकावत अचानक बेदम मारहाण करण्यास सुरुवात केली. अचानक झालेल्या या हल्ल्यामुळे पीडित तरुण पूर्णपणे घाबरून गेला. याच संधीचा फायदा घेऊन तिन्ही चोरट्यांनी त्याच्या खिशातील 3,000 रुपयांची रोख रक्कम बळजबरीने हिसकावून घेतली आणि तिथून पळ काढला.
दिवसाढवळ्या आणि प्रवाशांची मोठी वर्दळ असलेल्या ठिकाणी ही चोरीची घटना घडल्याने सर्वत्र आश्चर्य व्यक्त केले जात आहे. या घटनेनंतर इरफानने थेट बंडगार्डन पोलीस ठाणे गाठून आपबिती सांगितली. पोलिसांनी या प्रकरणी तक्रार नोंदीत करून घेतली असून परिसरातील सीसीटीव्ही फुटेजच्या आधारे तिन्ही भामट्यांचा शोध सुरू केला आहे.
