पुणे : पुण्यातील प्रसिद्ध व्यावसायिक विशाल अग्रवाल यांचे सुपुत्र केतन अग्रवाल यांच्या हत्येचा रहस्यमय उलगडा झाला आहे.तपासानुसार, मार्च 2026 पासून या हत्येचे नियोजन सुरू होते. आरोपींनी गुन्ह्यांचे चित्रपट, विविध पॉडकास्ट पाहिले आणि चॅटजीपीटी सारख्या एआय तंत्रज्ञानाची मदत घेऊन हा कट आखला. लोणावळ्यातील टायगर पॉईंटसह अनेक परिसराची त्यांनी रेकी केली. मार्च 2025 मध्ये लोहगडावर एका महिलेच्या झालेल्या मृत्यूनंतर, केतनचा मृत्यूही अपघाती वाटेल या विचाराने त्यांनी लोहगड किल्ल्याची जागा निवडल्याच समोर आलं आहे.विशेष म्हणजे केतनला लोहगडावर घेऊन जाण्यासाठी आरोपींनी मुलीच्या नावाने फेक इन्स्टाग्राम अकाऊंट देखील बनवल्याची नवी माहिती समोर आली आहे.
लोहगड किल्ल्यावरून अपघाती निष्काळजीपणामुळे किंवा सेल्फी घेताना पाय घसरून केतन अग्रवाल पडल्याचा बनाव सुरुवातीला करण्यात आला होता. परंतु, पोलिसांनी सखोल तपास केला असता ही हत्या त्यांची होणारी पत्नी सिया गोयल, तिचा मित्र चेतन चौधरी आणि रितेश हांगे यांनी मिळून घडवून आणल्याचे समोर आले आहे. या प्रकरणी पोलिसांनी 5053 पानांचे दोषारोपपत्र दाखल केले असून 5 प्रत्यक्षदर्शी साक्षीदार यात समाविष्ट आहेत.
हत्याकांडाचा मास्टरप्लाॅन अन् कट कसा रचला?
पहिला प्रयत्न: सुरुवातीला परराज्यातील व्यक्तीमार्फत केतनला अपंग करण्याचा प्रयत्न करण्यात आला. परंतु, पकडले जाण्याच्या भीतीपोटी तो बेत रद्द केला गेला.
दुसरा प्रयत्न: प्री-वेडिंग शूटसाठी बालीला जात असताना खालापूर येथील कॅफेत सियाने केतनचा पासपोर्ट फाडून फेकला, ज्यामुळे हा प्रवास रद्द झाला. त्यानंतर 14 जूनला लोहगडावर त्याला ढकलण्याचा प्रयत्न फसला.
अंतिम कट: रितेश हांगेने ‘माही’ नावाचे बनावट इन्स्टाग्राम अकाउंट तयार केले. सियाला सरप्राईज वाढदिवस साजरा करण्याचे कारण देऊन केतनला 18 जून रोजी लोहगडावर बोलावण्यात आले.
घटना घडली त्या दिवशी चेतन चौधरी आधीच गडावरील मंदिरात लपून बसला होता. केतनचे लक्ष नसताना सिया आणि चेतनने अचानक त्याला ढकलून थेट शेकडो फूट खोल दरीत पाडले. या भीषण घटनेत केतनचा जागीच मृत्यू झाला.
हत्या केल्यानंतर आरोपींनी बनावट सोशल मीडिया अकाउंट डिलीट करून पुरावे नष्ट करण्याचा प्रयत्न केला. मात्र, पोलिसांनी तांत्रिक तपास आणि साक्षीदारांच्या आधारे तिन्ही आरोपींना बेड्या ठोकून या गुन्ह्याचा पर्दाफाश केला आहे.या प्रकरणातून आणखीन काय धक्कादायक खुलासे समोर येतात याकडे सर्वांचे लक्ष लागून राहिले आहे.
