मुंबई : मुंबईतील गणेशोत्सवादरम्यान घडणाऱ्या दुर्दैवी घटनांची मालिका थांबलेली नाही. भुलेश्वर आणि कुर्ला येथील आगमन सोहळ्यात गणेशमूर्ती कोसळल्याच्या घटना ताज्या असतानाच, आता दक्षिण मुंबईतील काळाचौकी येथे एका गंभीर दुर्घटनेची नोंद झाली आहे. काळाचौकीचा महागणपती मंडप परिसरात विजेचा तीव्र धक्का लागल्याने एका 8 वर्षांच्या चिमुरडीचा उपचारादरम्यान मृत्यू झाला, तर अन्य 5 जण जखमी झाले आहेत.
मिळालेल्या माहितीनुसार, ही दुर्घटना शनिवारी मध्यरात्री 2:40 वाजण्याच्या सुमारास घडली. यादव कुटुंब आणि स्थानिक भाविक दर्शनासाठी रांगेत उभे असताना गर्दीमुळे त्यांनी परत फिरण्याचा निर्णय घेतला. मंडपाच्या शेजारी असलेल्या एका दुकानाजवळ उभे असताना तेथे लावलेल्या लाईटच्या वायरमधून अचानक विजेचा प्रवाह उतरला. सुरक्षेच्या उपाययोजनांचा अभाव असल्यामुळे ही दुर्घटना घडल्याचा आरोप मृत मुलीच्या नातेवाईकांनी केला आहे.
घटनेची माहिती मिळताच अग्निशमन दल आणि पोलिसांनी तात्काळ घटनास्थळी धाव घेतली. जखमींमध्ये 8 ते 20 वर्षे वयोगटातील दोन मुले आणि तीन मुलींचा समावेश आहे. सर्वांना तात्काळ मसीना रुग्णालयात दाखल करण्यात आले, तर गंभीर जखमी झालेल्या मुलीला परळ येथील ग्लोबल रुग्णालयात हलवण्यात आले होते. दुर्दैवाने उपचारादरम्यान या चिमुरडीची प्राणज्योत मालवली.
सध्या मसीना रुग्णालयात तीन जखमींवर अतिदक्षता कक्षात उपचार सुरू आहेत. या प्रकरणी काळाचौकी पोलीस विजेचा धक्का कसा लागला याचा अधिक तपास करत आहेत.यंदाच्या गणेशोत्सवाची सुरुवातच अपघातांनी झाली आहे. 22 ऑगस्ट रोजी भुलेश्वरचा राजाची मूर्ती कोसळून संकेत नेवशे (33) आणि ब्रिजेश हेमंत जोशी (30) या दोन कार्यकर्त्यांचा मृत्यू झाला होता.
यानंतर कुर्ल्यात धारावीतील प्रेमनगरचा महाराजा या मंडळाची मूर्ती तुटल्याने तिचे तातडीने विसर्जन करावे लागले होते. आता काळाचौकीतील या दुर्दैवी घटनेमुळे संपूर्ण लालबाग-परळ परिसरात शोककळा पसरली आहे.
