पुणे : मराठा आरक्षणाच्या मुद्द्यावरून प्रदीर्घ उपोषण करणारे कार्यकर्ते मनोज जरांगे पाटील यांची तब्येत खालावल्याने त्यांना छत्रपती संभाजीनगर येथील गॅलेक्सी रुग्णालयात दाखल करण्यात आले आहे. सलग 20 दिवस अन्न-त्याग केल्यामुळे त्यांच्या शरीरावर गंभीर परिणाम झाला असून सध्या त्यांची प्रकृती अत्यंत चिंताजनक आहे.
उपचार करणाऱ्या वैद्यकीय पथकाने त्यांच्या आरोग्याबाबत महत्त्वाची माहिती दिली आहे. डॉक्टरांच्या मते, दीर्घकाळ उपाशी राहिल्यामुळे जरांगे पाटील यांच्या शरीरातील पाण्याचे प्रमाण अत्यंत कमी झाले आहे. हायड्रेशनची पातळी घटल्यामुळे त्यांच्या किडनी (मूत्रपिंड) आणि हृदयावर सूज आल्याचे निष्पन्न झाले आहे. शरीरात प्रचंड अशक्तपणा आला असून उपोषणामुळे इतरही अनेक आरोग्यविषयक अडचणी निर्माण झाल्या आहेत.
सध्या त्यांच्यावर अतिदक्षता विभागात वैद्यकीय देखरेखीखाली उपचार सुरू आहेत. प्रकृतीत सुधारणा व्हावी यासाठी त्यांना सध्या केवळ पाणी, ज्यूस आणि आवश्यक द्रवपदार्थ दिले जात आहेत. डॉक्टरांच्या सल्ल्यानुसार त्यांना पूर्ण विश्रांतीची नितांत गरज आहे.
मनोज जरांगे पाटील यांच्या शरीराची झालेली हानी भरून काढण्यासाठी पुढील काही दिवस अत्यंत महत्त्वाचे आहेत. या पार्श्वभूमीवर रुग्णालयातील डॉक्टरांनी संपूर्ण मराठा समाजाला आणि त्यांच्या समर्थकांना महत्त्वाचे आवाहन केले आहे. पुढील 5 ते 6 दिवस कोणत्याही कार्यकर्त्यांनी अथवा नागरिकांनी जरांगे पाटील यांना भेटण्यासाठी रुग्णालयात गर्दी करू नये. त्यांच्या जलद उपचारासाठी आणि आरोग्यासाठी सर्वांनी सहकार्य करून त्यांना पूर्ण विश्रांती घेऊ द्यावी, अशी विनंती डॉक्टरांनी केली आहे.
