लोणी काळभोर, ता. 21 : दारूच्या नशेत भरधाव आणि बेदरकारपणे आयशर वाहन चालवून स्वतःसह इतरांच्या जीविताला धोका निर्माण करणाऱ्या चालकावर लोणी काळभोर पोलिसांनी कारवाई केली. पुणे-सोलापूर रस्त्यावर रिव्हरव्ह्यू सिटी रोडजवळ शुक्रवारी (18 सप्टेंबर) सायंकाळी सहा वाजण्याच्या सुमारास हा प्रकार उघडकीस आला.
याप्रकरणी वाहनचालक जावेद अब्दुलरहिमान आवटे (वय 34, रा. वेळापूर, ता. माळशिरस, जि. सोलापूर) याच्यावर गुन्हा दाखल करण्यात आला आहे. पोलिसांनी दिलेल्या माहितीनुसार, लोणी स्टेशन चौकी येथे पोलिस अंमलदार गणेश शेळके व होमगार्ड सुरवसे हे 18 सप्टेंबर रोजी मार्शल ड्युटीवर होते. सायंकाळी सुमारे 5.54 वाजता डायल 112 वर एका नागरिकाने फोन करून पुणे-सोलापूर रस्त्यावर रिव्हरव्ह्यू सिटी रोडजवळ एक व्यक्ती दारू पिऊन वाहन चालवत असल्याची माहिती दिली.
या घटनेची माहिती मिळताच पोलिस पथकाने तातडीने घटनास्थळी धाव घेतली. त्यावेळी एक व्यक्ती वाहतुकीस अडथळा निर्माण होईल तसेच स्वतःच्या आणि इतरांच्या जीविताला धोका निर्माण होईल अशा पद्धतीने आयशर वाहन चालविताना आढळून आला. पोलिसांनी वाहन थांबवून चालकाची चौकशी केली. त्यावेळी त्याच्या तोंडातून मद्याचा उग्र वास येत असल्याचे फिर्यादीत नमूद करण्यात आले आहे.
पोलिसांच्या चौकशीत चालकाचे नाव जावेद आवटे असल्याचे समोर आले. या प्रकरणी पोलिस अंमलदार गणेश शेळके यांनी सरकारतर्फे फिर्याद दिली असून, चालकाविरुद्ध भारतीय न्याय संहिता कलम 281 आणि मोटार वाहन कायदा कलम 185 अन्वये गुन्हा दाखल करण्यात आला आहे. पुढील तपास लोणी काळभोर पोलिस करीत आहेत.
