पुणे: ऑनलाइन खरेदी करणाऱ्या नागरिकांना लक्ष्य करून सायबर चोरटे फसवणुकीचे नवनवीन मार्ग शोधत आहेत. पार्सल पोहोचवण्याच्या बहाण्याने मोबाईलवर संपर्क साधून नागरिकांना बनावट ॲप डाउनलोड करायला लावले जात आहे. पुण्यातील एका 62 वर्षीय महिला डॉक्टरला अशाच प्रकारे 74 हजार रुपयांचा आर्थिक फटका बसला आहे. या प्रकरणी त्यांनी पोलिसांकडे तक्रार दाखल केली असून, पुढील तपास सुरू आहे.
ही घटना बिबवेवाडीतील संत एकनाथनगर परिसरात राहणाऱ्या महिला डॉक्टरसोबत घडली. 6 ऑक्टोबर रोजी त्यांच्या मोबाईलवर एका अनोळखी क्रमांकावरून फोन आला. फोन करणाऱ्या व्यक्तीने आपण ऑनलाइन वस्तू घरपोच पोहोचवणाऱ्या कंपनीतून बोलत असल्याचे सांगितले. पार्सलच्या कारणाने विश्वास संपादन केल्यानंतर संबंधित व्यक्तीने डॉक्टर आणि त्यांच्या पतीच्या मोबाईलवर एपीके फाइल पाठवली.
ही फाइल डाउनलोड करून त्यातील ॲप सुरू करण्यास सांगण्यात आले. समोरच्या व्यक्तीच्या बोलण्यावर विश्वास ठेवून डॉक्टरांनी ॲप डाउनलोड केले. त्यानंतर त्यामध्ये बँक खात्याशी संबंधित माहिती भरली. याच संधीचा फायदा घेत सायबर चोरट्यांनी बँक खात्यातील पैशांवर डल्ला मारला.
काही वेळातच खात्यातून 74 हजार रुपये काढण्यात आल्याचे डॉक्टरांच्या लक्षात आले. आपली फसवणूक झाल्याचे समजताच त्यांनी पोलिसांकडे धाव घेत तक्रार नोंदवली. या प्रकरणाचा पुढील तपास गुन्हे शाखेचे निरीक्षक सूरज बेंद्रे करीत आहेत.
दरम्यान, अशा प्रकारच्या ऑनलाइन फसवणुकीपासून बचाव करण्यासाठी नागरिकांनी सतर्क राहणे गरजेचे आहे. पार्सलच्या नावाखाली अनोळखी व्यक्तीने लिंक पाठवली किंवा एपीके फाइल डाउनलोड करण्यास सांगितले, तर ती उघडण्यापूर्वी खात्री करा. अनोळखी ॲपमध्ये बँक खात्याची माहिती, पासवर्ड किंवा ओटीपी भरू नका. संशयास्पद व्यवहार झाल्यास तातडीने बँकेशी आणि सायबर पोलिसांशी संपर्क साधा.
