पुणे : पुणे विभागातील पदवीधर आणि शिक्षक मतदारसंघाच्या निवडणुकीसाठी भाजपने प्रचाराची सुरुवात केली असली, तरी या कार्यक्रमाला पक्षातील अनेक नगरसेवक अनुपस्थित राहिल्याने आता अंतर्गत हालचालींना वेग आला आहे. प्रदेशाध्यक्ष रवींद्र चव्हाण यांच्या उपस्थितीत झालेल्या या कार्यक्रमाला गैरहजर राहिलेल्या सुमारे 100 नगरसेवकांना कारणे दाखवा नोटीस बजावली जाण्याची शक्यता असल्याची माहिती सूत्रांनी दिली आहे.
शनिवारी पुणे विभागातील भाजपच्या पदवीधर आणि शिक्षक मतदारसंघाच्या उमेदवारांच्या प्रचाराचा शुभारंभ करण्यात आला. या कार्यक्रमाला केंद्रीय राज्यमंत्री मुरलीधर मोहोळ, उच्च व तंत्रशिक्षण मंत्री चंद्रकांत पाटील, राज्यमंत्री माधुरी मिसाळ, पुण्याच्या महापौर मंजुषा नागपुरे तसेच पक्षातील आमदार उपस्थित होते. पक्षाच्या सर्व नगरसेवकांना या कार्यक्रमाला उपस्थित राहण्याचे निर्देश देण्यात आल्याचे सांगितले जाते.
मात्र, कार्यक्रमाला 100 हून अधिक नगरसेवकांनी उपस्थिती लावली नसल्याची माहिती समोर आली आहे. काही नगरसेवक कार्यक्रमस्थळी आले, पण काही वेळातच निघून गेले. त्यामुळे पक्षाच्या कार्यक्रमातील उपस्थितीचा मुद्दा चर्चेत आला आहे.
नगरसेवकांच्या अनुपस्थितीची बाब लक्षात आल्यानंतर सभागृहनेते गणेश बिडकर यांनी उपस्थित सदस्यांची नोंद घेण्यास सांगितले. त्यांनी स्वतः सभागृहात फिरून कोणते नगरसेवक कार्यक्रमाला आले आहेत, याची खातरजमा केली. त्यानंतर गैरहजर राहिलेल्या नगरसेवकांकडून स्पष्टीकरण मागवण्याची तयारी सुरू झाल्याचे समजते.
दरम्यान, पुणे महापालिकेच्या सार्वत्रिक निवडणुकीत भाजपचे 119 नगरसेवक निवडून आले होते. त्यानंतर 7 स्वीकृत नगरसेवकांची निवड झाल्याने पक्षाची एकूण संख्या 126 झाली. पक्षाच्या बैठका, आंदोलने आणि महत्त्वाच्या कार्यक्रमांना नगरसेवकांनी उपस्थित राहणे अपेक्षित असते. त्यामुळे या प्रचार कार्यक्रमातील अनुपस्थितीबाबत पक्ष काय भूमिका घेतो, याकडे लक्ष लागले आहे.
