लोणी काळभोर, ता. 9 : पुणे-सोलापूर राष्ट्रीय महामार्गावरून दुचाकीवरून घरी परतणाऱ्या 23 वर्षीय तरुणीचा पाठलाग करून तिच्या दुचाकीला कट मारत अश्लील हातवारे व शिवीगाळ केल्याचा धक्कादायक प्रकार समोर आला आहे. कदमवाकवस्ती (ता. हवेली) ग्रामपंचायत हद्दीतील कवडीपाट परिसरात 4 सप्टेंबर रोजी रात्री साडेअकराच्या सुमारास ही घटना घडली. याप्रकरणी लोणी काळभोर पोलिस ठाण्यात दोन सख्ख्या भावांविरुद्ध विविध गंभीर कलमान्वये गुन्हा दाखल करण्यात आला आहे.
नटराज उर्फ नट्या शिवाजी कदम (वय 24) आणि बाब्या शिवाजी कदम (वय 22दोघेही रा. टोलनाका, कदमवस्ती, ता. हवेली, जि. पुणे) अशी गुन्हा दाखल झालेल्या आरोपींची नावे आहेत. याप्रकरणी लोणी काळभोर परिसरातील 23 वर्षीय तरुणीने पोलिसांत फिर्याद दिली आहे.
पोलिसांनी दिलेल्या माहितीनुसार, फिर्यादी तरुणी नोकरदार असून, कामानिमित्त भावासोबत हडपसर येथे गेल्या होत्या. काम आटोपून त्या भावासोबत दुचाकीवरून लोणी काळभोर येथील घराकडे परतत होत्या. त्यांची दुचाकी कवडीपाट टोलनाक्याजवळ आली असता आरोपी नटराज उर्फ नट्या आणि बाब्या कदम यांनी दुचाकीचा पाठलाग सुरू केला. त्यानंतर आरोपींनी तरुणीच्या दुचाकीला कट मारून अडथळा निर्माण केला. तसेच अश्लील हातवारे आणि शिवीगाळ करून तिच्या मनास लज्जा उत्पन्न होईल, असे गैरवर्तन केल्याचे फिर्यादीत नमूद करण्यात आले आहे.
या प्रकरणी तरुणीने दिलेल्या फिर्यादीनुसार नटराज कदम आणि बाब्या कदम यांच्याविरुद्ध भारतीय न्याय संहिता (BNS) कलम 74 75 (i) (ii) 79 351 (2)281 व 3 (5) अन्वये गुन्हा दाखल करण्यात आला आहे. पुढील तपास लोणी काळभोर पोलिस ठाण्याचे वरिष्ठ पोलिस निरीक्षक प्रदीप पवार यांच्या मार्गदर्शनाखाली पोलीस उपनिरीक्षक जगताप करीत आहेत.
