पुणे : गणेशोत्सवात महाप्रसादाचे आयोजन करणाऱ्या सार्वजनिक गणेश मंडळांसाठी अन्न व औषध प्रशासनाने (FDA) विशेष नियमावली जाहीर केली आहे. महाप्रसादातील अन्नपदार्थांची गुणवत्ता, स्वच्छता आणि नागरिकांची सुरक्षितता लक्षात घेऊन मंडळांना एक दिवसाचा तात्पुरता अन्न परवाना घेणे आता अनिवार्य करण्यात आले आहे. FDA आयुक्त तुकाराम मुंढे यांच्या मार्गदर्शनाखाली ही प्रक्रिया राबवण्यात येत आहे.
तात्पुरत्या परवान्यासाठी मंडळाच्या आयोजकांना अर्जामध्ये स्वयंपाकी किंवा केटररचे नाव आणि त्याचा FDA परवाना क्रमांक नमूद करावा लागणार आहे. यासोबत मंडळाचे नाव, महाप्रसादाची तारीख आणि वेळ तसेच तयार करण्यात येणाऱ्या अन्नपदार्थांची संपूर्ण माहिती द्यावी लागेल. अन्न तयार करण्यासाठी वापरण्यात येणाऱ्या पाण्याचा स्रोत, अन्न सुरक्षा पर्यवेक्षकाचे नाव आणि कच्चा माल पुरवठादारांची माहितीही अर्जात द्यावी लागणार आहे.
महाप्रसाद तयार झाल्यानंतर त्यातील शिजवलेले अन्न ४८ तास सुरक्षित पद्धतीने जतन करून ठेवण्याची व्यवस्था मंडळाकडे असणे आवश्यक आहे. अन्नातून नागरिकांच्या आरोग्याला धोका निर्माण होऊ नये, यासाठी ही व्यवस्था महत्त्वाची असल्याचे प्रशासनाकडून स्पष्ट करण्यात आले आहे.
या तात्पुरत्या परवान्यासाठी मंडळांना केवळ १०० रुपये शुल्क भरावे लागणार आहे. मंडळाच्या अध्यक्षांनी किंवा त्यांच्या प्रतिनिधीने अर्ज तयार करून तो [fdasatara22@gmail.com](mailto:fdasatara22@gmail.com) किंवा [ts.shingade@nic.in](mailto:ts.shingade@nic.in) या ई-मेलवर पाठवायचा आहे. त्यानंतर festivals.mahafda.in या संकेतस्थळावर जाऊन ‘Stall Holder’ या श्रेणीतून ऑनलाइन अर्ज भरून १०० रुपयांचे शुल्क जमा करावे लागेल.
ऑनलाइन प्रक्रिया पूर्ण झाल्यानंतर तात्पुरता परवाना ऑनलाइन उपलब्ध होणार आहे. त्यामुळे महाप्रसादाचे आयोजन करणाऱ्या गणेश मंडळांनी वेळेत परवाना घेऊन अन्नसुरक्षा आणि स्वच्छतेच्या नियमांचे पालन करावे, असे आवाहन करण्यात आले आहे.
