हडपसर, ता. २८ : मांजरी परिसरात विवाहित तरुणाने गळफास घेऊन आत्महत्या केल्याची धक्कादायक घटना समोर आली असून, या प्रकरणात पत्नी आणि तिच्या कथित प्रियकराविरुद्ध आत्महत्येस प्रवृत्त केल्याचा गुन्हा दाखल करण्यात आला आहे. मृत तरुणाच्या हातावर लिहिलेला संदेश आणि घटनास्थळी मिळालेली सुसाईड नोट यामुळे या प्रकरणाने गंभीर वळण घेतले आहे. या प्रकरणाचा पुढील तपास सहाय्यक पोलीस निरीक्षक उमेश रोकडे करीत आहेत.
याबाबत मयत प्रविण दत्ता माने (वय २८) यांची आई ललिता दत्ता माने यांनी मांजरी पोलीस ठाण्यात फिर्याद दिली आहे. त्यानुसार प्रणाली प्रविण माने आणि सुमीत जाधव यांच्याविरुद्ध गुन्हा दाखल करण्यात आला आहे. पोलिसांनी दिलेल्या माहितीनुसार, प्रविण माने यांचा विवाह २० मे २०२५ रोजी प्रणाली जगन्नाथ जाधव हिच्याशी झाला होता. विवाहानंतर दोघे मांजरी येथील ओमसाई पार्क फेज-५ मधील राहत्या घरी कुटुंबासोबत राहत होते.
२० जुलै २०२६ रोजी प्रणाली माने या कोणालाही न सांगता घरातून निघून गेल्या होत्या. त्यानंतर मांजरी पोलीस ठाण्यात बेपत्ता असल्याची नोंद करण्यात आली. नंतर त्या स्वतः पोलीस ठाण्यात हजर झाल्या. त्यांनी पोलिसांसमोर सासरच्या मंडळींकडून त्रास होत असल्याचे सांगितले आणि आई-वडिलांसोबत माहेरी निघून गेल्या. त्यानंतर प्रविण माने यांनी पत्नीचे लग्नापूर्वीपासून सुमीत जाधव याच्यासोबत प्रेमसंबंध असल्याचे कुटुंबीयांना सांगितले. तसेच लग्नानंतरही ते संबंध सुरू असल्याचा संशय व्यक्त केला. यामुळे पती-पत्नीमध्ये वारंवार वाद होत असल्याचेही फिर्यादीत नमूद करण्यात आले आहे.
२३ जुलै २०२६ रोजी सकाळी ललिता माने या कामावर गेल्या असताना घरात इतर नातेवाईक होते. सकाळी सुमारे ११ वाजता त्या घरी परतल्या असता प्रविण यांनी बेडरूमचा दरवाजा उघडत नसल्याचे लक्षात आले. शेजाऱ्यांच्या मदतीने दरवाजा तोडून आत प्रवेश केला असता प्रविण यांनी साडीच्या साहाय्याने गळफास घेतल्याचे आढळून आले.
दरम्यान, मृताच्या हातावर “बायकोने आणि तिच्या प्रियकराने जीव घेतला” असा मजकूर लिहिलेला होता. तसेच घटनास्थळी सुसाईड नोटही आढळल्याचा दावा करण्यात आला आहे. त्यानंतर पोलिसांनी मृतदेह ताब्यात घेऊन शवविच्छेदनासाठी पाठवला. अंत्यसंस्कारानंतर कुटुंबीयांनी औपचारिक तक्रार दाखल केली.
या तक्रारीवरून मांजरी पोलिसांनी प्रणाली प्रविण माने आणि सुमीत जाधव यांच्याविरुद्ध आत्महत्येस प्रवृत्त केल्याप्रकरणी गुन्हा दाखल केला आहे. या प्रकरणातील आरोप हे फिर्यादीच्या तक्रारीवर आधारित असून, त्याची सत्यता तपासातून स्पष्ट होणार आहे. पोलिसांकडून सर्व बाजूंचा तपास सुरू आहे.
