पुणे: पिंपरी-चिंचवड शहरातील नागरिकांसमोर पुन्हा एकदा पाणीटंचाईचे संकट उभे राहिले आहे. कमी पावसामुळे निर्माण झालेल्या दुष्काळजन्य परिस्थितीचा परिणाम शहराच्या पाणीपुरवठ्यावर होणार असून, 16 ऑक्टोबरपासून पाण्यात आणखी 10% कपात केली जाणार आहे. सध्या शहरातील अनेक भागांत दिवसाआड पाणीपुरवठा होत असल्याने या निर्णयामुळे नागरिकांच्या अडचणी वाढण्याची शक्यता आहे.
शहराला पवना धरणातून सुमारे 540 MLD, आंद्रा धरणातून 95 MLD आणि MIDCकडून 30 MLD पाणी मिळते. अशा प्रकारे सध्या एकूण 665 MLD पाण्याचा पुरवठा होत आहे. मात्र, शहराची दररोजची गरज सुमारे 770 MLD इतकी आहे. त्यामुळे आधीपासूनच तब्बल 105 MLD पाण्याची कमतरता आहे.
पावसाने सुरुवातीला ओढ दिल्यामुळे जलसंपदा विभागाने यापूर्वीच पाणीपुरवठ्यात 15% कपात केली होती. ही कपात मागे घेण्याची मागणी करण्यात आली होती. मात्र, पाणीसाठ्याची स्थिती आणि दुष्काळजन्य परिस्थिती लक्षात घेता कपात कायम ठेवण्यात आली. आता त्यात आणखी 10% कपात होणार आहे.
या परिस्थितीचा सर्वाधिक परिणाम काही सोसायट्यांवर होत आहे. वाकड परिसरातील 200 ते 500 फ्लॅट असलेल्या 34 सोसायट्यांना महापालिकेकडून सध्या गरजेच्या तुलनेत केवळ 50% पाणी मिळत असल्याची माहिती आहे. त्यामुळे रहिवाशांना दैनंदिन गरज भागवण्यासाठी टँकर मागवावे लागत आहेत. नियमित आणि पुरेशा क्षमतेने पाणीपुरवठा करावा, अशी मागणी नागरिकांकडून होत आहे.16 ऑक्टोबरपासून धरणांमधून उपलब्ध होणाऱ्या पाण्यानुसार शहरातील पाणीवाटपाचे नियोजन केले जाणार असून त्यानुसार नियोजन केले जाणार आहे.
