पुणे – स्वातंत्र्याचा अमृत महोत्सव अंतर्गत राबवण्यात येणाऱ्या ‘हर घर तिरंगा’उपक्रमाबाबत पुणे जिल्ह्याचे नियोजन झालेले असून २१ लाख ६० हजार घरांवर तिरंगा फडकणार आहे. स्वातंत्र्याचा अमृत महोत्सव यामुळे पुणे शहरात अनेक ठिकाणी विविध उपक्रम राबवण्यात येणार आहे. पुण्यातील अनेक ठिकाणी तिरंग्याची विक्री केंद्र देखील असणार आहे.
पुण्याचे जिल्हाधिकारी राजेश देशमुख यांनी या संदर्भात बैठक घेतली होती. यावेळी केंद्र शासनाच्या सांस्कृतिक कार्य मंत्रालयाअंतर्गत पश्चिम क्षेत्र सांस्कृतिक केंद्राच्या संचालककिरण सोनी गुप्ता, पुणे जिल्हा परिषदेचे मुख्य कार्यकारी अधिकारी आयुष प्रसाद उपस्थित होते.
जिल्ह्यात २१ लाख ६० हजार कुटुंबे असून या प्रत्येक घरावर राष्ट्रध्वज लावण्याचे नियोजन करण्यात आल्याची माहिती पुणे जिल्हा परिषदेचे मुख्य कार्यकारी अधिकारी आयुष प्रसाद यांनी या उपक्रमाबाबत जिल्ह्यातील नियोजनाची माहिती दिली.
दरम्यान, जिल्ह्यात मोठ्या प्रमाणात कापड उद्योग, व्यवसाय असून त्या माध्यमातून ध्वजाची उपलब्धता करण्याचे नियोजन करण्यात आले आहे. माफक दरात ध्वज उपलब्ध करुन देण्यात येणार आहे. तसेच काही दानशूर संस्था, सहकारी साखर कारखाने आदींकडून गरजूंना ध्वज मोफत उपलब्ध करुन देण्याचे नियोजन आहे.
