पुणे: खेड तालुक्यातील शिंदेगाव येथे एका लेबर कॅम्पमध्ये घडलेल्या धक्कादायक घटनेने चाकण औद्योगिक परिसरात खळबळ उडाली आहे. मंगळवारी दुपारी सुमारे 2:45 वाजण्याच्या सुमारास दोन मजुरांमध्ये झालेल्या साध्या वादाचे रूपांतर हिंसक संघर्षात झाले. या झटापटीत दोघांनी एकमेकांवर चाकू आणि दगडी पाट्याने हल्ला केला. गंभीर जखमी झालेल्या दोन्ही मजुरांचा उपचारादरम्यान मृत्यू झाला. शिंदेगाव येथील निप्पॉन सांसो कंपनीसमोरील लेबर कॅम्पमध्ये हि घटना घडली.
मिळालेल्या माहितीनुसार, घटनेच्या वेळी दोघांमध्ये कोणत्यातरी किरकोळ कारणावरून वाद झाला. सुरुवातीला सुरू झालेला शाब्दिक वाद काही वेळातच गंभीर स्वरूपाचा झाला. रागाच्या भरात दोघांनी एकमेकांना मारहाण करण्यास सुरुवात केली. यानंतर परिस्थिती अधिक चिघळली आणि दोघांनी जवळ असलेल्या वस्तूंचा वापर करून एकमेकांवर हल्ला केला. एका मजुराने चाकूने तर दुसऱ्याने दगडी पाट्याने वार केल्याचे समोर आले आहे. या हल्ल्यात दोघेही गंभीर जखमी होऊन रक्ताच्या थारोळ्यात पडले.
घटनेनंतर कॅम्पमधील इतर कामगारांनी तातडीने दोघांना रुग्णालयात दाखल केले. चिरंजीत बसूमातो याच्यावर चाकण ग्रामीण रुग्णालयात उपचार सुरू होते, तर अमरुष उराव याला पुण्यातील ससून रुग्णालयात दाखल करण्यात आले होते. मात्र, गंभीर दुखापत आणि मोठ्या प्रमाणात रक्तस्राव झाल्याने उपचारादरम्यान दोघांचाही मृत्यू झाला. चिरंजीत बसूमातो (वय 37) आणि अमरुष उराव (वय 44) अशी मृत्यू झालेल्या दोन्ही कामगारांची नावे आहेत. दोघेही मूळचे पश्चिम बंगालमधील रहिवासी होते.
या प्रकाराची माहिती मिळताच पोलिसांनी घटनास्थळी भेट देऊन तपास सुरू केला. याप्रकरणी महाळुंगे एमआयडीसी पोलीस ठाण्यात गुन्हा दाखल करण्यात आला असून अधिक तपास सुरु आहे.
