यवत, ता. १ : दौंड तालुक्यातील टेळेवाडी आणि कासुर्डी परिसरातून दोन अल्पवयीन मुली संशयास्पदरीत्या बेपत्ता झाल्याने खळबळ उडाली आहे. दोन्ही घटनांप्रकरणी यवत पोलीस ठाण्यात स्वतंत्र गुन्हे दाखल करण्यात आले असून पोलिसांनी शोधमोहीम सुरू केली आहे. एका प्रकरणात विशिष्ट तरुणावर संशय व्यक्त करण्यात आला आहे.
पोलिसांनी दिलेल्या माहितीनुसार, टेळेवाडी येथे उसतोडणीसाठी वास्तव्यास असलेली करिष्मा (वय १७, बदललेले नाव) ही अल्पवयीन मुलगी २९ मेच्या मध्यरात्री ते ३० मेच्या पहाटे दरम्यान बेपत्ता झाली. करिष्मा ही आपल्या बहिणीसोबत खोलीत झोपली होती. मात्र रात्री ती अचानक गायब झाल्याचे लक्षात आल्यानंतर नातेवाईकांनी परिसरात तिचा शोध घेतला. सर्वत्र शोध घेऊनही ती आढळून न आल्याने तिला फूस लावून पळवून नेल्याचा संशय व्यक्त करण्यात आला आहे. या प्रकरणी करिष्माच्या बहिणीने यवत पोलीस ठाण्यात फिर्याद दिली असून भारतीय न्याय संहिता कलम १३७(२) अन्वये गुन्हा दाखल करण्यात आला आहे.
दुसऱ्या घटनेत कासुर्डी येथील करीना (वय १५ वर्षे, बदललेले नाव) ही रविवारी (दि. ३१) दुपारी बेपत्ता झाली. करीना ही बकऱ्यांच्या वाड्यावर थांबली होती. तिची आई बकऱ्या चारण्यासाठी गेल्यानंतर परत आल्यावर मुलगी तेथे आढळून आली नाही. नातेवाईक, मित्र-मैत्रिणी तसेच परिसरात शोध घेऊनही तिचा ठावठिकाणा लागला नाही.
करीनाला कोणीतरी अज्ञात व्यक्तीने आमिष दाखवून पळवून नेल्याचा संशय व्यक्त करण्यात आला असून, नातेवाईकांनी लोणी काळभोर येथील एका तरुणावर संशय व्यक्त केला आहे. या प्रकरणीही भारतीय न्याय संहिता कलम १३७(२) अन्वये गुन्हा दाखल करण्यात आला आहे.
दरम्यान, दौंड तालुक्यात अवघ्या दोन दिवसांत दोन अल्पवयीन मुली बेपत्ता झाल्याने पालकांमध्ये चिंतेचे वातावरण निर्माण झाले आहे. यवत पोलीस दोन्ही मुलींचा शोध घेत असून संबंधित संशयितांचा माग काढण्यासाठी विशेष पथके कार्यरत करण्यात आली आहेत.
