पुणे : कोरेगाव पार्क परिसरात विश्वासाचा गैरफायदा घेत एका बँक कर्मचाऱ्याला लुटले आहे. काही दिवसांपूर्वी झालेल्या ओळखीचा फायदा घेत आरोपीने प्रथम मैत्री केली आणि त्यानंतर संधी साधून मोबाईल, लॅपटॉप तसेच बँक कार्ड्स चोरून मोठा आर्थिक गंडा घातला. या घटनेमुळे परिसरात खळबळ उडाली आहे.
मिळालेल्या माहितीनुसार, संबंधित बँक कर्मचारी एका वसतिगृहात मुक्कामासाठी राहत होता. त्याच ठिकाणी राहणाऱ्या एका तरुणाने त्याच्याशी हळूहळू ओळख वाढवली. गोड बोलून आणि विश्वास संपादन करून आरोपीने त्याच्याशी जवळीक निर्माण केली. त्यामुळे बँक कर्मचाऱ्याला त्याच्यावर कोणताही संशय आला नाही.
योग्य संधी मिळताच आरोपीने बँक कर्मचाऱ्याच्या खोलीत प्रवेश करून महागडा लॅपटॉप, मोबाईल फोन आणि डेबिट तसेच क्रेडिट कार्ड्स चोरून नेले. चोरीनंतर आरोपी इथेच थांबला नाही. त्याने चोरलेल्या बँक कार्ड्सचा वापर करून बँक कर्मचाऱ्याच्या खात्यातून मोठी रक्कम काढल्याचेही समोर आले आहे.
या संपूर्ण घटनेत लॅपटॉप, मोबाईल आणि इतर वस्तूंसह एकूण सुमारे 4.51 लाख रुपयांचा ऐवज चोरीला गेला. त्यापैकी बँक कार्ड्सच्या मदतीने 3.25 लाख रुपये खात्यातून काढण्यात आल्याची माहिती पोलिसांनी दिली आहे. या प्रकरणाचा तपास सहाय्यक पोलीस निरीक्षक उमाकांत महाडिक करत असून, आरोपीचा शोध घेण्यासाठी अधिक तपास सुरु आहे.
