पुणे: हडपसर परिसरात मालकिणीच्या विश्वासाचा गैरफायदा घेऊन घरकाम करणाऱ्या एका महिलेने चोरी केल्याची धक्कादायक घटना समोर आली आहे. विश्वासू म्हणून कामावर ठेवलेल्या मोलकरणीने घरातील लाखो रुपयांचे सोन्याचे दागिने लंपास केल्याने परिसरात खळबळ उडाली आहे. अंबिका सदाशिव खडगेकर (वय ३८) असे अटक करण्यात आलेल्या आरोपी महिलेचे नाव आहे.
ही चोरीची घटना हडपसर येथील एका घरात घडली. घरमालकिणीने कपाटातील बॅगेत ७,३०,००० रुपयांचे सोन्याचे दागिने अत्यंत सुरक्षितपणे ठेवले होते. मात्र, काही काळानंतर हे दागिने चोरीला गेल्याचे त्यांच्या लक्षात आले. विशेष म्हणजे, चोरी करताना घराचे कुलूप तोडण्यात आले नव्हते किंवा कपाटाची कोणतीही मोडतोड झाली नव्हती. त्यामुळे संशयाची सुई घरातील व्यक्तींकडेच गेली. यानंतर घरमालकिणीने तात्काळ हडपसर पोलीस ठाण्यात धाव घेऊन तक्रार दाखल केली.
घटनेचे गांभीर्य लक्षात घेऊन पोलिसांनी तपास सुरू केला, परंतु घटनास्थळी चोरीच्या कोणत्याही खुणा आढळल्या नाहीत. यावरून पोलिसांचा संशय घरात नियमित काम करणाऱ्या मोलकरीण अंबिका खडगेकर हिच्यावर गेला. पोलिसांनी तिला ताब्यात घेऊन विश्वासात घेत सखोल चौकशी केली. सुरुवातीला तिने उडवाउडवीची उत्तरे देण्याचा प्रयत्न केला, परंतु पोलीस प्रशासनाने खाक्या दाखवताच तिने पैशांच्या गरजेपोटी चोरी केल्याची कबुली दिली. हडपसर पोलिसांनी या धडक कारवाईत आरोपीकडून सर्व दागिने जप्त केले असून अधिक तपास सुरु आहे.
