आळंदी: वारकरी संप्रदायाचे मुख्य केंद्र असलेल्या आळंदीतील संत ज्ञानेश्वर महाराज समाधी मंदिरातून एक अतिशय संतापजनक घटना समोर आली आहे. माऊलींच्या गाभाऱ्यातील दानपेटीतून रोकड लंपास करण्यात आली आहे. धक्कादायक बाब म्हणजे, देवस्थानच्या सुरक्षेसाठी आणि सेवेसाठी नेमलेल्या एका कर्मचाऱ्यानेच हा गैरप्रकार केला आहे. या गंभीर घटनेमुळे आळंदी परिसरासह माऊलींच्या भक्तांमध्ये तीव्र संतापाची लाट पसरली असून आळंदी पोलीस ठाण्यात याप्रकरणी अधिकृत गुन्हा दाखल करण्यात आला आहे.
विशाल बाळू वारूळे असे गुन्हा दाखल झालेल्या सेवेकऱ्याचे नाव आहे. मंदिरातील दानपेटीत गोळा झालेली रक्कम सुरक्षितपणे कॅशियरकडे जमा करण्याची जबाबदारी या कर्मचाऱ्यावर सोपवण्यात आली होती. त्याने 12, 13 आणि 16 मे 2026 या कालावधीत ही चोरी केली. पेटीतील नोटा बादलीत भरत असताना, कोणाचे लक्ष नाही हे पाहून त्याने हुशारीने पैशांची पाकिटे स्वतःच्या पिशवीत लपवली. अशा प्रकारे त्याने ३ दिवसांत एकूण 15000 रुपयांची रोकड चोरली. हा सगळा प्रकार देवस्थानच्या सीसीटीव्ही कॅमेऱ्यात स्पष्टपणे कैद झाला.
या घटनेनंतर ज्ञानेश्वर महाराज देवस्थान प्रशासनाच्या कारभारावर आणि तिथल्या सुरक्षिततेवर स्थानिक नागरिकांनी मोठे प्रश्नचिन्ह उपस्थित केले आहे. पोलीस सध्या या प्रकरणाचा सखोल तपास करत असून यामागे आणखी कोणाचा हात आहे का, याचा शोध घेत आहेत.
