पुणे: दिवाळी संपली असली तरी फटाक्यांमुळे निर्माण झालेले प्रदूषण अद्याप कमी झालेले नाही. त्यातच रस्त्यांवरील वाहनांची वाढती संख्या आणि इंधनाच्या ज्वलनामुळे हवेची गुणवत्ता आणखी खालावत आहे. पुण्यातील काही भागांमध्ये प्रदूषणाची पातळी चिंताजनक झाली असून भोसरी येथील हवेची गुणवत्ता दिल्लीपेक्षाही खराब नोंदवण्यात आली आहे. गुरुवारी भोसरीचा हवा गुणवत्ता निर्देशांक 427 वर पोहोचला, तर शिवाजीनगरमध्ये हा आकडा 250 इतका नोंदवण्यात आला.
दिल्ली, मुंबई, पुणे, अहमदाबाद आणि कोलकाता या देशातील 5 प्रमुख शहरांमधील हवेच्या गुणवत्तेवर इंडियन इन्स्टिट्यूट ऑफ ट्रॉपिकल मेट्रोलॉजी (IITM) लक्ष ठेवते. यंदा दिवाळीच्या काळात पुण्यात फटाक्यांमुळे मोठ्या प्रमाणात प्रदूषण झाल्याची नोंद झाली होती. सण संपल्यानंतरही परिस्थितीत फारशी सुधारणा झालेली नाही.
दिल्लीपेक्षाही पुण्यातील हवा खराब
गुरुवारी दिल्लीचा हवा गुणवत्ता निर्देशांक 320 होता. मात्र, पुण्यातील भोसरी परिसरात तो 427 पर्यंत पोहोचला. याशिवाय शिवाजीनगरमध्ये 250 आणि निगडीमध्ये 214 इतकी प्रदूषणाची पातळी नोंदवण्यात आली. त्यामुळे पुण्यातील काही भागांमधील हवा आरोग्यासाठी चिंतेचा विषय ठरत आहे.
धूलिकण आणि विषारी वायूंचे प्रमाण वाढले
शहरातील हवेत पीएम 10 आणि पीएम 2.5 या सूक्ष्म धूलिकणांचे प्रमाण वाढल्याचे निरीक्षण नोंदवण्यात आले आहे. वाहनांमधून बाहेर पडणारा धूर आणि इंधन जळताना तयार होणारे घटक यामुळे प्रदूषणात भर पडत आहे. त्याचबरोबर कार्बन मोनॉक्साइडचे प्रमाणही वाढल्याचे समोर आले आहे.
हवेतील या बदलांमुळे श्वसनाचा त्रास असलेल्या नागरिकांना अधिक काळजी घ्यावी लागणार आहे. लहान मुले, ज्येष्ठ नागरिक आणि दमा असलेल्या व्यक्तींनी विशेष खबरदारी घेणे आवश्यक आहे.
