राहुलकुमार अवचट
पुणे: पुणे-सोलापूर राष्ट्रीय महामार्गावर एक अत्यंत भीषण अपघाताची घटना घडली आहे. दोन अज्ञात वाहनांनी दिलेल्या धडकेत एका तरुणाला आपला जीव गमवावा लागला आहे.
मिळालेल्या माहितीनुसार, आज पहाटे एक तरुण आपल्या दुचाकीवरून पुणे-सोलापूर महामार्गाने सोलापूरच्या दिशेने जात होता. पहाटे 3.30 ते 4.00 च्या सुमारास पाठीमागून येणाऱ्या एका अज्ञात वाहनाने त्याच्या दुचाकीला जोराची धडक दिली. ही धडक इतकी भीषण होती की, तो तरुण दुभाजक ओलांडून रस्त्याच्या दुसऱ्या बाजूला म्हणजेच सोलापूर-पुणे लेनवर जाऊन पडला.
त्याच वेळी सोलापूर बाजूकडून पुण्याच्या दिशेने जाणाऱ्या दुसऱ्या एका अज्ञात वाहनाने रस्त्यावर पडलेल्या या तरुणाला पुन्हा जोराची धडक दिली. दोन वेगवेगळ्या वाहनांच्या धडकेमुळे तरुण गंभीररीत्या जखमी झाला.
या अपघाताची माहिती मिळताच श्रीदत्त ॲम्बुलन्सचे चालक समीर अन्सारी यांच्यासह पोलीस विभागाचे कर्मचारी प्रतीक गरुड आणि संदीप करे यांनी तातडीने घटनास्थळी धाव घेतली. मात्र, दोन्ही वाहनांची धडक खूप मोठी असल्याने दुचाकीस्वराचा जागीच मृत्यू झाला होता.
या अपघातानंतर दोन्ही अज्ञात वाहने घटनास्थळावरून फरार झाली आहेत. यवत पोलीस या प्रकरणी पुढील तपास करत असून, अपघात घडवणाऱ्या वाहनांचा शोध सुरू आहे. नागरिकांनी रात्रीच्या वेळी महामार्गावर काळजीपूर्वक वाहन चालवावे, असे आवाहन पोलिसांकडून करण्यात येत आहे.
