यवत, ता. 22 : दौंड तालुक्यातील भांडगाव येथून १७ वर्षीय अल्पवयीन मुलगी संशयास्पदरीत्या बेपत्ता झाल्याची धक्कादायक घटना समोर आली आहे. “शाळेत मॅजिक बसचा क्लास आहे,” असे सांगून घरातून बाहेर पडलेल्या मुलीचा दिवसभर शोध घेऊनही पत्ता लागला नसल्याने कुटुंबीयांनी यवत पोलीस ठाण्यात धाव घेतली आहे. कोणीतरी अज्ञात व्यक्तीने अल्पवयीन मुलीला आमिष दाखवून किंवा फूस लावून पळवून नेल्याचा संशय व्यक्त करण्यात आला असून, पोलिसांनी अज्ञात इसमाविरोधात अपहरणाचा गुन्हा दाखल केला आहे.
याप्रकरणी अल्पवयीन मुलीच्या ४३ वर्षीय वडिलांनी यवत पोलीस ठाण्यात फिर्याद दिली आहे. पोलिसांनी दिलेल्या माहितीनुसार, फिर्यादी हे कुटुंबासोबत भांडगाव येथे वास्तव्यास आहेत. टेलर काम करून ते कुटुंबाचा उदरनिर्वाह करतात. बेपत्ता झालेली मुलही ही परिसरातील एका शाळेत शिक्षण घेत आहे. मंगळवारी (ता. २०) सकाळी साडेनऊच्या सुमारास फरीदाखातून हिने “शाळेत मॅजिक बसचा क्लास आहे,” असे सांगून घरातून बाहेर पडली.
मात्र, बराच वेळ उलटूनही ती घरी परतली नाही. दुपारी चार वाजेपर्यंत कुटुंबीयांनी तिची वाट पाहिली. त्यानंतर त्यांनी शाळेत जाऊन चौकशी केली असता, ती शाळेतही आली नसल्याचे समोर आले.
यानंतर कुटुंबीयांनी भांडगाव परिसर, आजूबाजूचा भाग, मैत्रिणी, नातेवाईक आणि इतर ठिकाणी मुलीचा शोध घेतला. मात्र, तिच्याबाबत कोणतीही माहिती मिळाली नाही. त्यामुळे कोणीतरी अज्ञात व्यक्तीने अल्पवयीन असल्याचे माहिती असतानाही तिला फूस लावून पळवून नेल्याचा संशय व्यक्त करण्यात आला आहे. बेपत्ता मुलीचे वर्णन असे : उंची सुमारे ४ फूट, रंग गोरा, काळे लांब केस, अंगात निळ्या रंगाची सलवार व निळा टॉप, पायात काळ्या रंगाच्या चप्पला, उजव्या हातात लाल-पिवळ्या रंगाचा दोरा, गळ्यात काळ्या रंगाची चैन आणि कानात पिवळ्या रंगाची रिंग. ती मराठी, हिंदी आणि भोजपुरी भाषा बोलते.
या घटनेमुळे भांडगाव परिसरात खळबळ उडाली असून, पालकांमध्ये भीतीचे वातावरण निर्माण झाले आहे. अल्पवयीन मुलींच्या सुरक्षिततेचा प्रश्न पुन्हा ऐरणीवर आला असून, पोलिसांनी तातडीने मुलीचा शोध घ्यावा, अशी मागणी नागरिकांकडून केली जात आहे. दरम्यान, यवत पोलिसांनी अज्ञात इसमाविरोधात गुन्हा दाखल केला असून, पुढील तपास पोलीस हवालदार भापकर करत आहेत.
