लोणी काळभोर, ता. १४ : पुणे–सोलापूर महामार्गावरील थेऊर फाटा परिसरात भरधाव दुचाकीच्या धडकेत गंभीर जखमी झालेल्या ७८ वर्षीय ज्येष्ठ नागरिकांचा उपचारादरम्यान मृत्यू झाल्याची दुर्दैवी घटना घडली आहे. आठवडाभर मृत्यूशी झुंज दिल्यानंतर ससून रुग्णालयात त्यांची प्राणज्योत मालवली. याप्रकरणी लोणी काळभोर पोलिसांनी दुचाकी चालकाविरुद्ध निष्काळजीपणे वाहन चालवून मृत्यूस कारणीभूत ठरल्याप्रकरणी गुन्हा दाखल केला आहे.
लक्ष्मण नारायण होमकर (वय ७८) असे मृत्यू झालेल्याचे नाव आहे. तर धनाजी वसंत चंदनशिवे (रा. शंकरगाव, ता. पंढरपूर, जि. सोलापूर) असे गुन्हा दाखल करण्यात आलेल्याचे नाव आहे. याप्रकरणी स्नेहल गणेश व्हावळ यांनी लोणी काळभोर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, लक्ष्मण होमकर हे कुंजीरवाडी परिसरात एकटे राहत होते. १ जुलै रोजी रात्री साडेनऊच्या सुमारास ते थेऊर फाटा येथून दूध घेऊन पायी घरी परतत असताना एस-४जी हॉटेलसमोर भरधाव वेगाने आलेल्या हिरो स्प्लेंडर प्लस (एमएच-१२-डीके-९२९१) या दुचाकीने त्यांना जोरदार धडक दिली. या अपघातात त्यांच्या डोक्याला गंभीर दुखापत होऊन ते बेशुद्ध पडले.
दरम्यान, या घटनेनंतर स्थानिक नागरिकांनी त्यांना तातडीने लोणी काळभोर येथील विश्वराज रुग्णालयात दाखल केले. त्यानंतर पुढील उपचारासाठी भारती रुग्णालय आणि नंतर ससून रुग्णालयात हलविण्यात आले. मात्र, उपचार सुरू असतानाच ७ जुलै रोजी पहाटे डॉक्टरांनी त्यांना मृत घोषित केले.
अपघातानंतर घटनास्थळी उपस्थित असलेल्या व्यक्तीने दुचाकीचा क्रमांक आणि चालकाची माहिती उपलब्ध करून दिली होती. त्यानुसार धनाजी चंदनशिवे याच्याविरुद्ध बेदरकार आणि निष्काळजीपणे वाहन चालवून मृत्यूस कारणीभूत ठरल्याप्रकरणी लोणी काळभोर पोलिस ठाण्यात गुन्हा दाखल करण्यात आला असून पुढील तपास सुरू आहे. या घटनेमुळे पुणे–सोलापूर महामार्गावरील भरधाव वाहनचालकांवर कठोर कारवाई करण्याची मागणी नागरिकांकडून होत आहे.
