पुणे: काँग्रेस पक्षाची सध्या पुण्यात अवस्था अत्यंत बिकट झाली असून, अंतर्गत गटबाजी आता चव्हाट्यावर आली आहे. पुणे महानगरपालिकेच्या स्वीकृत नगरसेवक निवडीवरून सुरू झालेला वाद आता थेट रस्त्यावरील बॅनरबाजीपर्यंत पोहोचला आहे. यामुळे पुण्यातील राजकीय वातावरण चांगलेच तापले आहे.
पुणे काँग्रेसमध्ये गेल्या अनेक दिवसांपासून निष्ठावान कार्यकर्ते आणि वरिष्ठ नेते यांच्यात संघर्ष सुरू आहे. कार्यकर्त्यांचा आरोप आहे की, पक्षातील वरिष्ठ नेते स्वीकृत नगरसेवक पदे, निवडणुकीची तिकिटे आणि महत्त्वाची पदे देण्यासाठी मोठ्या प्रमाणावर पैशांची देवाणघेवाण करत आहेत. हा संताप केवळ पक्षाच्या बैठकीपुरता मर्यादित न राहता आता शहरात झळकलेल्या एका वादग्रस्त फ्लेक्समुळे चव्हाट्यावर आला आहे.
‘फावड्याशेठ’ कोण? शहरात चर्चांना उधाण
शहरात लावण्यात आलेल्या या बॅनरवरील मजकूर अत्यंत खोचक आहे. “फावड्याशेठ, पांढरे कपडे घातले म्हणून काळा पैसा पांढरा होत नाही… सच्चा कार्यकर्त्यांचे वाटोळे केले,” अशा शब्दांत एका अज्ञात नेत्यावर हल्ला चढवण्यात आला आहे. या ‘फावड्याशेठ’चा रोख नक्की कोणाकडे आहे, याची खमंग चर्चा सध्या पुण्याच्या राजकीय वर्तुळात रंगली आहे. या बॅनरबाजीमुळे पक्षाची प्रतिमा तर मलीन झालीच आहे, पण कार्यकर्त्यांमधील असंतोष किती टोकाला गेला आहे, हे ही स्पष्ट झाले आहे.
राजकारणात जेव्हा कार्यकर्त्यांच्या कष्टाची दखल न घेता केवळ आर्थिक व्यवहारांना महत्त्व दिले जाते, तेव्हा बंडाळी उफाळून येते. येणाऱ्या निवडणुकांच्या पार्श्वभूमीवर काँग्रेसमधील ही गळती आणि गटबाजी महाविकास आघाडीसाठी पुण्यात चिंतेचा विषय ठरू शकते.
