युनूस तांबोळी
(Shirur News) शिरूर : रात्रीची वेळ होती…ऊसाच्या फडातून बिबटयाच्या गुरगुरण्याचा आवाज येत होता. आम्ही मात्र बछड्यांना बास्केटमध्ये सुरक्षित ठेवत होतो. मादीच्या गुरगुरण्याचा आवाजाने सगळेच भयभीत झाले होते. क्षणाचाही विलंब न लावता आम्ही सुरक्षीत अंतरावर गेलो. काळोखी रात्र, रातकिंड्याचा आवाज आणि ऊसाच्या पाचटावर बिबट्याच्या पावलांचा आवाज स्पष्ट ऐकू येत होता. बिबट्याची मादी दबक्या पावलाने बछड्यांजवळ आली.
आईच्या कुशीत बछडे विसावल्याने ऑपरेशन यशस्वी…!
ती… आली तिनं पाहिलं… अन एकेक पिल्लू हळूवार तोंडात घेऊन उसाच्या फडात जाऊ लागली. शेवटचा बछडा घेऊन गेल्यावर सर्वांनीच टाळ्या वाजविल्या. मादी आणि बछड्यांच वात्सल्य, प्रेम आणि भितीदायक वातावरणातील ते दृष्य आम्ही अनुभवत होतो. अखेर आईच्या कुशीत बछडे विसावल्याने ऑपरेशन यशस्वी झाले होते.
सविंदणे ( ता. शिरूर ) येथील (Shirur News ) लंघेमळ्यात आईपासून दूरावलेले चार बछडे अखेर रात्रीच्या काळोखात सोमवारी ( ता. २० ) पुन्हा आईच्या कुशीत विसावले. या घटने बाबत वनविभागाने माहिती देताना संपूर्ण चित्रच उभे केले. आई आणि पिलांची ताटातूट झाल्याने बिबट्याचे बछडे भेदरले होते. तर बिबट मादी देखील सैरभैर होऊन परिसरात डरकाळ्या मारत होती. सोमवारी रात्री साडेनऊच्या सुमारास अनेकांनी हा थरार अनुभवला आणि बिबट मादी पिलांना घेऊन जातानाचे हेलावून टाकणारे दृष्यही पाहिले.
येथील पंढरीनाथ धोडींबा लंघे उसाच्या फडात गेल्या दोन दिवसांपासून सुरू असलेल्या बिबट मादी व चार बछड्याच्या ताटातुटीच्या प्रसंगाला सोमवारी रात्री विराम मिळाला. बिबट मादी आपल्या चार बछड्यांसह या फडात वास्तव्याला होती. दरम्यान ऊसतोड चालू झाल्याने निवारा हिरावला जाण्याच्या आणि बछड्यांच्या सुरक्षेकरीता बिबट मादिने डरकाळ्या फोडत ऊसतोड कामगारांवर रविवारी ( ता. १९ ) सायंकाळी हल्ला केला होता. मात्र वेळीच सर्व ऊसतोड कामगार ऊसाच्या फडातून बाहेर पळाल्याने अनर्थ टळला. यात एका महिला जखम झाली.
या घटनेच्या दुसऱ्याच दिवशी याच ऊसाच्या फडात चार बछडे आढळून आले. त्यामुळे मादीही याच परिसरात असेल या धास्तीने परिसरात दहशतीचे वातावरण पसरले. ऊसतोडणीचे काम ही ठप्प झाले.
दरम्यान, शिरूरचे वनपरिक्षेत्र अधिकारी मनोहर म्हसेकर, वनपाल गमेश पवार, वनरक्षक ऋषीकेश लाड, वनकर्मचारी हनुमंत कारकूड, व शौकत शेख यांनी घटनास्ळी धाव घेऊन चारही बछडे ताब्यात घेतले. त्यांना पुन्हा आईकडे सोडविण्यासाठी सोमवार सायंकाळपासून रि युनियन ऑपरेशन राबविण्यात आले. त्यानूसार, जेथे हे बछडे सापडले होते.
त्याच जागेवर दोन छोट्या लोंखडी बास्केटमध्ये हे बछडे ठेवण्यात आले. रात्री ऑपरेशन राबवित असतानाच ऊसाच्या फडातून बिबट्याच्या गुरगुरण्याचा आवाज येत होता. सव्वानऊच्या सुमारास बिबट मादीने बास्केटमधील एकेका पिल्लाला तोंडात धरून सुरक्षीतस्थळी हलविले. वनविभागाचे हे रि युनियन ऑपरेशनअनेकांनी ऊसाच्या फडाच्या काही अंतरावर थांबून प्रत्यक्ष अनुभवले. मादी चारही बिबट्यांना घेऊन गेल्यावर उपस्थितांनी टाळ्यांचा गजर केला.
अधिक बातम्या वाचण्यासाठी येथे क्लिक करा…!
Shirur News : मलठणच्या उपसरपंचपदी दादासाहेब गावडे यांची बिनविरोध निवड!
Shirur News : आमदाबाद विद्यालयात जागतिक महिला दिन मोठ्या उत्साहात संपन्न!
