पोपट पाचंगे
रांजणगाव गणपती: श्री क्षेत्र ढोकसांगवी, ता.शिरुर (Shirur News) येथील ग्रामदैवत, कुलदैवत श्री खंडोबा देवाचा चंपाषष्ठी उत्सव मोठया उत्साहात साजरा करण्यात आला. यावेळी ‘सदानंदा चा येळकोट, येळकोट येळकोट जय मल्हार’ चा जयघोष करत हजारो भाविकांनी देवाचे मनोभावे दर्शन घेतले.
मार्गशीर्ष शुद्ध षष्ठी म्हणजेच चंपाषष्ठी. या चंपाषष्ठी उत्सवानिमित्त सकाळी ७ वाजता देवाची महापूजा व महाआरती पुजारी निलेश गुरव यांच्या हस्ते संपन्न झाली. चंपाषष्ठीनिमित्त श्री खंडोबा मंदिर व गाभाऱ्यात सोसायटीचे माजी अध्यक्ष सुहास मलगुंडे व युवा उद्योजक गोरक्ष मलगुंडे यांच्या विविध रंगी फुलांची आकर्षक सजावट करण्यात आली होती. देवाच्या दर्शनासाठी आलेल्या भाविकांचे फुलांची आकर्षक सजावट लक्ष वेधून घेत होती.मंदिर व प्रवेशद्वारावर ग्रामस्थांच्या वतीने आकर्षक विद्युत रोषणाई व मंदिरासमोर मंडप टाकण्यात आला होता.
ढोकसांगवी ग्रामस्थ व परिसरातील हजारो भाविकांनी चंपाषष्ठी उत्सवानिमित्त सदानंदाचा येळकोट करत तळी भरुन आणि भंडार व खोबरे उधळण करीत देवाचा जयघोष केला. सायंकाळी ६ वाजता देवाच्या पालखीची गावातून सवाद्य वाजत गाजत मिरवणूक काढण्यात आली.या मिरवणुकीत ग्रामस्थ व भाविक मोठया संख्येने सहभागी झाले होते.
