पुणे: दौंड तालुक्यातून शाळकरी मुलींशी संबंधित एक धक्कादायक घटना समोर आली आहे. शाळेतून घरी जाणाऱ्या 12 वर्षीय दोन अल्पवयीन बहिणींचा सलग 8 दिवस पाठलाग करून त्यांना त्रास देण्यात आल्याचा प्रकार उघडकीस आला आहे. या प्रकारामुळे घाबरलेल्या मुलींनी धाडस दाखवत आपल्या कुटुंबीयांना सर्व माहिती दिली आणि त्यानंतर पोलिसांकडे तक्रार दाखल करण्यात आली.
मिळालेल्या माहितीनुसार, दोन्ही बहिणी दररोज शाळेतून पायी घरी जात होत्या. याच वेळी आरोपी त्यांच्यावर लक्ष ठेवून होते. एका इको कारमधून आरोपी गेल्या काही दिवसांपासून त्यांचा पाठलाग करत असल्याचे तपासात समोर आले आहे. संबंधित कारचा क्रमांक MH 42 BS 8535 असल्याची माहिती पोलिसांनी दिली आहे.
27 जुलै रोजी आरोपींनी पारगाव चौक परिसरात मुलींचा रस्ता अडवला. त्यांनी कार मुलींसमोर उभी करून त्यांना थांबवले. त्यानंतर दोघांनी मुलींशी गैरवर्तन केल्याचा आरोप आहे. आरोपी प्रवीण थोरात याने मुलींशी अश्लील आणि आक्षेपार्ह वक्तव्य केले तसेच एका मुलीचा हात पकडून तिला जवळ ओढण्याचा प्रयत्न केल्याचे तक्रारीत नमूद करण्यात आले आहे.
दुसरा आरोपी दिनेश पासलकर यानेही दुसऱ्या बहिणीसोबत गैरवर्तन केल्याचा आरोप आहे. या प्रकारामुळे मानसिक त्रास सहन करणाऱ्या दोन्ही बहिणींनी अखेर घरी हा प्रकार सांगितला.
मुलींच्या कुटुंबीयांनी तातडीने यवत पोलीस ठाण्यात धाव घेत तक्रार दाखल केली. घटनेचे गांभीर्य लक्षात घेऊन पोलिसांनी त्वरित कारवाई करत खुटबाव परिसरातून दोन्ही आरोपींना ताब्यात घेतले.
पोलिसांनी आरोपींविरोधात भारतीय न्याय संहिता (BNS) आणि बाल लैंगिक अत्याचार प्रतिबंधक कायदा (POCSO) अंतर्गत गुन्हा दाखल केला असून अधिक चौकशी सुरु आहे.
