नांदेड : जिल्ह्यातील एका दुर्दैवी घटनेत अवघ्या तीन महिन्यांच्या कालावधीत संपूर्ण मोरे कुटुंब संपल्याची धक्कादायक माहिती समोर आली आहे. पती, दोन मुले आणि आता पत्नीचाही मृत्यू झाल्याने या सुखी परिवाराचा अंत झाला आहे.
काही महिन्यांपूर्वी, हिमायतनगर तालुक्यातील पोटा येथील जिल्हा परिषद शाळेत कार्यरत असलेले 42 वर्षीय शिक्षक सुनील मोरे यांनी हे टोकाचे पाऊल उचलले होते. व्हॉट्सॲपवर आत्महत्येचा संदेश ठेवून त्यांनी रात्रीच्या वेळी झोपेत असलेल्या 14 वर्षांची मुलगी सारा आणि 10 वर्षांचा मुलगा सुमेध यांची धारदार शस्त्राने हत्या केली. त्यानंतर 17 जुलै रोजी त्यांनी आपली भरधाव कार पुणेगाव येथील पुलावरून 50 फूट खोल गोदावरी नदीच्या पात्रात फेकून आयुष्य संपवले.
वरिष्ठ अधिकाऱ्यांच्या सततच्या त्रासाला कंटाळून आपण मुलांसह हे पाऊल उचलत असल्याचे मोरे यांनी आपल्या व्हॉट्सॲप स्टेटसमध्ये स्पष्ट केले होते. यामध्ये गट शिक्षण अधिकारी किशन फोले, विस्तार अधिकारी सूर्यकांत बाचे, केंद्रप्रमुख शिवाजी कदम आणि सहकारी शिक्षक दत्ता पवळे यांच्या त्रासाचा उल्लेख करण्यात आला होता.
पती आणि दोन्ही मुलांच्या अचानक निघून जाण्यामुळे सुनील मोरे यांच्या पत्नी शिक्षिका धम्मशीला मोरे या अत्यंत भीषण मानसिक तणावाखाली होत्या. त्या गेल्या तीन महिन्यांपासून सतत दुःखात होत्या आणि घराबाहेर पडणेही त्यांनी बंद केले होते. याआधीही त्यांनी स्वतःला संपवण्याचा प्रयत्न केला होता.
दोन दिवसांपूर्वी त्यांनी पुन्हा एकदा आत्महत्येचा प्रयत्न केला. गंभीर अवस्थेत त्यांना तातडीने रुग्णालयात दाखल करण्यात आले होते. मात्र, उपचारादरम्यान काल रात्री त्यांचीही प्राणज्योत मालवली. अशाप्रकारे एकाच कुटुंबातील चारही जणांचा अडीच ते तीन महिन्यांच्या अंतराने दुर्दैवी अंत झाला असून या घटनेमुळे संपूर्ण परिसरात हळहळ व्यक्त केली जात आहे.
