पुणे: पुण्यात काम करताना झालेल्या ओळखीचे पुढे प्रेमसंबंधात रूपांतर झाले. मात्र, तरुणीच्या कुटुंबीयांनी लग्नाला नकार दिल्यानंतर या प्रकरणाला धक्कादायक वळण मिळाले. नकाराचा राग मनात धरून एका तरुणाने तरुणीला सोशल मीडियाच्या माध्यमातून त्रास देण्यास सुरुवात केल्याचा आरोप आहे. त्याने 15 पेक्षा अधिक बनावट Instagram अकाउंट्स तयार करून तिचे फोटो मॉर्फ केले आणि अश्लील संदेश पाठवले. तसेच तिच्या नातेवाईकांनाही या अकाउंट्समधून टॅग करण्यात आले. या प्रकरणी रोहित अंकुश चव्हाण (रा. मंगळवार पेठ, कराड, जि. सातारा) याच्याविरोधात छत्रपती संभाजीनगरमधील सिटी चौक पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, सुमारे वर्षभरापूर्वी पुण्यातील एका कंपनीत काम करताना रोहित आणि तरुणीची ओळख झाली होती. त्यानंतर दोघांमध्ये मैत्री निर्माण झाली. पुढे 14 फेब्रुवारी 2026 रोजी रोहितने तरुणीसमोर लग्नाचा प्रस्ताव ठेवला.
तरुणीने ही बाब कुटुंबीयांना सांगितल्यानंतर तिच्या वडिलांनी रोहितची भेट घेतली. मात्र, त्याचे वर्तन आणि बोलण्याची पद्धत योग्य न वाटल्याने कुटुंबीयांनी विवाहास नकार दिला. यानंतर रोहितने तरुणीला सोशल मीडियावरून त्रास देण्यास सुरुवात केल्याचे तक्रारीत नमूद आहे. त्याने वेगवेगळ्या नावाने 15 हून अधिक बनावट Instagram अकाउंट्स तयार केले. या माध्यमातून तरुणीला अश्लील तसेच शिवीगाळ करणारे संदेश पाठवण्यात आले. याशिवाय तिचे फोटो मॉर्फ करून ते नातेवाईकांना टॅग करण्यात आले. अश्लील संदेश पाठवून तरुणीची आणि तिच्या कुटुंबाची बदनामी करण्याचा प्रयत्न केल्याचा आरोप आहे.
सततच्या त्रासाला कंटाळून तरुणीने सायबर पोलिसांकडे तक्रार केली. पोलिसांनी तांत्रिक तपास करत बनावट अकाउंट्सशी संबंधित IP Address आणि इतर डिजिटल माहिती तपासली. त्यातून या प्रकरणामागे रोहित चव्हाण असल्याचे समोर आल्याचे पोलिसांनी सांगितले. त्यानंतर 5 सप्टेंबर रोजी तरुणीच्या तक्रारीवरून सिटी चौक पोलीस ठाण्यात गुन्हा दाखल करण्यात आला असून, पुढील तपास सुरू आहे.
