पुणे: पुणे महानगर परिवहन महामंडळाने सुरू केलेली ‘रातराणी’ बससेवा प्रचंड हिट ठरली आहे. ही सेवा सुरू होऊन जेमतेम 20 दिवस झाले असले तरी, रात्री उशिरा प्रवास करणाऱ्या नागरिकांना यामुळे मोठा दिलासा मिळाला आहे. नागरिकांचा उत्साह बघता, पीएमपीने आता शहराच्या इतर भागांमध्येही ही ‘नाइट एक्सप्रेस’ सेवा सुरू करावी, अशी जोरदार मागणी होत आहे.
पुण्यात रात्री उशिरा प्रवास करणाऱ्या अनेक प्रवाशांना अनेकदा रात्रीच्या प्रवासामुळे रिक्षा चालक जास्त पैसे मागत होते. तसेच, रात्रीच्या वेळी महिला आणि सामान्य प्रवाशांच्या सुरक्षिततेचा प्रश्न गंभीर बनला होता. या अडचणी दूर करण्यासाठीच पीएमपी प्रशासनाने पुणे स्टेशन ते वाघोली मार्गावर ही सेवा सुरू केली, ज्यामुळे प्रवाशांची मोठी गैरसोय दूर झाली आहे.
पीएमपीची ही ‘रातराणी’ बससेवा पुणे शहराच्या अनेक महत्त्वाच्या मार्गांवर उपलब्ध आहे. वाघोली मार्गाचा समावेश होण्यापूर्वीच, ही सेवा सहा प्रमुख मार्गांवर लोकप्रिय झाली होती. सध्या ही ‘नाइट एक्सप्रेस’ पुणे स्टेशन ते निगडी, निगडी ते पुणे स्टेशन (वाकडेवाडीमार्गे), पुणे स्टेशन ते NDA गेट 10, कात्रज ते शिवाजीनगर बसस्थानक, कात्रज ते पुणे स्टेशन, हडपसर ते पुणे स्टेशन, हडपसर ते स्वारगेट आणि नुकताच सुरू झालेला पुणे स्टेशन ते वाघोली अशा एकूण आठ मार्गांवर प्रवाशांना रात्रीच्या वेळी सुरक्षित आणि स्वस्त प्रवास पुरवते.
पीएमपीच्या ‘रातराणी’ या सेवेच्या यशामुळे, रात्रीच्या वेळी पुणे शहरात प्रवास करणे आता अधिक सोपे झाले आहे.
