पुणे: दहशतवादी (Pune News) संघटना ‘अल कायदा इन इंडियन सबकाँटिनेन्ट (AQIS)’ च्या समर्थनार्थ जिहादचा प्रचार केल्याच्या आरोपावरून पुण्यातून अटक करण्यात आलेल्या जुबेर हंगरगेकरकडून मोठी माहिती समोर आली आहे. जुबेर च्या मोबाईल फोनमधील पाकिस्तानसह आखाती देशांमधील तब्बल पाच आंतरराष्ट्रीय क्रमांक आढळले आहेत. यामुळे तपास यंत्रणांच्या भुवया उंचावल्या असून, हे नंबर नेमके कुणाचे आहेत, याचा कसून तपास सुरू आहे.
आंतरराष्ट्रीय कनेक्शन उघड
संशयित दहशतवादी जुबेर हंगरगेकर याच्याकडून तपास यंत्रणांनी जप्त केलेल्या जुने आणि सध्या वापरात असलेले अशा दोन्ही फोनमध्ये आंतरराष्ट्रीय क्रमांक सेव्ह असल्याचे उघड झाले आहे. हे सर्व आंतरराष्ट्रीय क्रमांक जुबेर हंगरगेकर याच्यासाठी अत्यंत महत्त्वाचे मानले जात असून, यातून त्याचे थेट आंतरराष्ट्रीय दहशतवादी संघटनांशी संपर्क होते का? याचा तपास सध्या सुरु आहे.
त्याला या आंतरराष्ट्रीय क्रमांकांबाबत विचारणा केली असता, हे नंबर कोणाचे आहेत किंवा त्यांचा कशाशी संबंध आहे, याबद्दल माहिती नसल्याचे उडवाउडवीचे उत्तर दिले .
दरम्यान, दिल्लीत नुकत्याच झालेल्या स्फोटाच्या पार्श्वभूमीवर जुबेर हंगरगेकरची अटक तपास यंत्रणांसाठी महत्त्वपूर्ण ठरली होती. जुबेर चा दिल्लीत झालेल्या स्फोटाशी काही संबंध आहे का? याचा तपासही पोलीस करत आहेत.
