पुणे: पुण्यातील कात्रज भागातील (Pune Crime) आंबेगाव परिसरात प्रेमप्रकरणातून तरुणावर (Ambegaon News) तीक्ष्ण शस्त्राने वार करून खून केल्याची घटना घडली आहे. या प्रकरणी आंबेगाव पोलीस ठाण्यात दोघांविरुद्ध गुन्हा दाखल करण्यात आला असून परिसरात खळबळ उडाली आहे. (Latest Marathi News)
जावेद ख्वाजामियाँ पठाण (वय 34, रा. ख्वाजानगर, शनी मंदिराजवळ, भोकर, जि. नांदेड) असे खून झालेल्या तरुणाचे नाव आहे. याप्रकरणी त्याचा भाऊ रौफ उस्मान शेख (वय 35, सध्या रा. भूमकर चौक, नऱ्हे, मूळ रा. ख्वाजानगर, भोकर, जि. नांदेड) याने आंबेगाव पोलीस ठाणे येथे फिर्याद दिली आहे.
ओळखीचे रूपांतर प्रेमसंबंधात
पोलिसांनी दिलेल्या माहितीनुसार, जावेद पठाण हा पुण्यात एका ठिकाणी काम करत होता. त्याच दरम्यान आरोपीच्या नात्यातील एका तरुणीशी त्याची ओळख झाली. पुढे या ओळखीचे रूपांतर प्रेमसंबंधात झाले. मात्र या प्रेमप्रकरणाला आरोपीने विरोध केला होता. या कारणावरून दोन्ही बाजूंमध्ये तणाव निर्माण झाला होता.
माझ्या बहिणीला सोड…
सोमवारी 22 डिसेंबर रोजी सायंकाळी सुमारे 6.45 वाजण्याच्या सुमारास जावेद हा आंबेगाव परिसरातील गायमुख भागात थांबला असताना आरोपी आणि त्याच्या साथीदाराने त्याला गाठले. त्यांनी जावेदला तरुणीसोबतचे संबंध तोडण्यास सांगितले. यावरून त्यांच्यात जोरदार वाद झाला. वादाचे रूपांतर हाणामारीत झाले आणि आरोपी व त्याच्या मित्राने जावेदवर तीक्ष्ण शस्त्राने वार केले.
उपचारादरम्यान मृत्यू
या हल्ल्यात जावेद गंभीर जखमी झाला. त्याला तातडीने खासगी रुग्णालयात दाखल करण्यात आले. त्यानंतर पुढील उपचारांसाठी ससून रुग्णालयात हलवण्यात आले. मात्र उपचारादरम्यान रात्री उशिरा जावेदचा मृत्यू झाला.
तपास सुरु
घटनेची माहिती मिळताच पोलीस उपायुक्त मिलिंद मोहिते आणि सहायक पोलीस आयुक्त राहुल आवारे यांनी घटनास्थळी भेट दिली. आरोपी आणि त्याचा साथीदार सध्या फरार असून त्यांचा शोध घेण्यासाठी पोलिसांची पथके रवाना करण्यात आली आहेत, अशी माहिती वरिष्ठ पोलीस निरीक्षक शरद झिने यांनी दिली. या प्रकरणाचा पुढील तपास गुन्हे शाखेचे पोलीस निरीक्षक गजानन चोरमले करत आहेत.
