पुणे: शिरूर तालुक्यातील (Shikrapur News) सणसवाडी येथे 23 वर्षीय तरुणाने चार दिवसांपूर्वी साखरपुडा झाल्यानंतर विहिरीत उडी मारून आत्महत्या केल्याची धक्कादायक घटना घडली आहे. रितेश हरगुडे असे (Pune News) आत्महत्या केलेल्या तरुणाचे नाव असून, या घटनेमुळे परिसरात हळहळ व्यक्त केली जात आहे. रितेशने आत्महत्येचे टोकाचे पाऊल का उचलले, याचे कारण अद्याप स्पष्ट झालेले नाही. शिक्रापूर पोलीस या प्रकरणाचा सखोल तपास करत आहेत. (Latest Marathi News)
मिळालेल्या माहितीनुसार, शुक्रवारी पहाटे रितेश अचानक घरातून बाहेर निघून गेला. बराच वेळ होऊनही तो घरी न परतल्याने कुटुंबीयांनी त्याच्याशी संपर्क साधण्याचा प्रयत्न केला. मात्र रितेशने फोन उचलला नाही. यामुळे कुटुंबीयांनी घरासमोरील सीसीटीव्ही कॅमेरे तपासले. मात्र त्यामध्ये काहीही संशयास्पद दिसून आले नाही. (Marathi News)
यानंतर कुटुंबीयांनी घराच्या मागील बाजूला शोध घेतला असता, घराजवळील विहिरीजवळ रितेशची चप्पल आणि मोबाईल आढळून आले. त्यामुळे त्याने विहिरीत उडी मारल्याचा संशय बळावला. तत्काळ शिक्रापूर पोलिसांना याची माहिती देण्यात आली. (Marathi Batmya)
शिक्रापूर पोलिसांच्या मदतीने पुणे महानगर विकास प्राधिकरणाच्या अग्निशमन दलाने विहिरीत शोधमोहीम राबवली. काही वेळानंतर विहिरीतून रितेशचा मृतदेह बाहेर काढण्यात आला. मृतदेह शवविच्छेदनासाठी पाठवण्यात आला असून पुढील तपास सुरू आहे.
या शोध मोहिमेत अग्निशमन दलाचे शुभम चौधरी, दिग्विजय नलवडे, शुभम बढे, योगेश पाटील, मयूर गोसावी, अक्षय बाबर, अभिषेक पवार, सागर जानकर, लहू मुंडे, राजेंद्र फुंदे तसेच आपदा मित्र वैभव निकाळजे आणि राहुल गायकवाड सहभागी होते.
चार दिवसांपूर्वी साखरपुडा झालेल्या तरुणाने आत्महत्या केल्याने कुटुंबीयांवर दुःखाचा डोंगर कोसळला असून, या घटनेने सणसवाडी परिसरात शोककळा पसरली आहे.
