मुंबई, दि. 24: राज्यात बंदी असलेल्या गुटखा व तत्सम अंमली पदार्थांविरोधात कठोर कारवाई करण्यासाठी अन्न व औषध प्रशासन सज्ज झाले आहे. प्रतिबंधित पदार्थ आढळल्यास संबंधित कार्यक्षेत्रातील अधिकाऱ्यांवर थेट निलंबनाची कारवाई करण्यात येईल, असा इशारा विशेष सहाय्य मंत्री नरहरी झिरवळ (Narhari Zirwal) यांनी दिला आहे.
एखाद्या अधिकाऱ्यांच्या कार्यक्षेत्रात प्रतिबंधित अन्नपदार्थांची विक्री सुरू असल्याचे निदर्शनास आल्यास त्या क्षेत्रातील सर्व संबंधित अधिकाऱ्यांना जबाबदार धरून कारवाई करण्यात येईल, असे स्पष्ट करणारे परिपत्रक मंत्री झिरवाळ यांच्या निर्देशानंतर जारी करण्यात आले आहे.
या अनुषंगाने अन्न सुरक्षा आयुक्त श्रीधर दुबे पाटील यांनीही परिपत्रक काढून सर्व विभागीय सह आयुक्त (अन्न) यांना प्रतिबंधित अन्नपदार्थांची छुप्या व अवैध मार्गाने विक्री, साठा आणि वाहतूक करणाऱ्या व्यावसायिकांविरोधात प्रभावी कारवाई करण्याचे आदेश दिले आहेत.
सह आयुक्त (अन्न), सहायक आयुक्त (अन्न) आणि अन्न सुरक्षा अधिकाऱ्यांनी आपल्या कार्यक्षेत्रातील अन्न आस्थापनांची नियमित तपासणी करावी. तसेच प्रतिबंधित अन्नपदार्थांची विक्री, साठवणूक व वितरण होणार नाही, याची काटेकोर दक्षता घ्यावी आणि बंदीच्या आदेशांची प्रभावी अंमलबजावणी सुनिश्चित करावी, असे निर्देश मंत्री नरहरी झिरवाळ यांनी दिले आहेत.
