पुणे: गुन्हेगारीला आळा घालण्यासाठी पुणे पोलिसांकडून शहरात विविध ठिकाणी कारवाया सुरू असतानाच पोलीस दलातीलच 3 कर्मचाऱ्यांवर निलंबनाची कारवाई करण्यात आली आहे. गंभीर गुन्ह्यातील रेकॉर्डवरील आरोपीच्या मुलाच्या वाढदिवसाच्या पार्टीला पोलिसांनी उपस्थित राहून सहभाग घेतल्याचे चौकशीत समोर आले. या प्रकारामुळे पोलीस विभागात खळबळ उडाली आहे.
मिळालेल्या माहितीनुसार, 2 जुलै रोजी संबंधित आरोपीने आपल्या मुलाच्या वाढदिवसानिमित्त पार्टी आयोजित केली होती. या कार्यक्रमाला 3 पोलीस कर्मचारी उपस्थित होते. आरोपीशी जवळीक ठेवणे आणि अशा कार्यक्रमात सहभागी होणे हे पोलीस दलाच्या शिस्तीला धरून नसल्याचे वरिष्ठ अधिकाऱ्यांच्या निदर्शनास आले.
या प्रकरणाची माहिती मिळाल्यानंतर पोलीस उपायुक्त कार्यालयाकडून सविस्तर चौकशी करण्यात आली. चौकशीनंतर तयार करण्यात आलेला गोपनीय अहवाल 20 जुलै रोजी वरिष्ठ अधिकाऱ्यांकडे सादर करण्यात आला. या अहवालाच्या आधारे पुढील कारवाई करण्यात आली.
अपर पोलीस आयुक्त (प्रशासन) संजय पाटील यांनी तिन्ही कर्मचाऱ्यांना तात्काळ निलंबित करण्याचे आदेश शुक्रवारी जारी केले. गुन्हेगारी पार्श्वभूमी असलेल्या व्यक्तींशी जवळीक, बेजबाबदार वर्तन आणि पोलीस दलाची शिस्तभंग केल्याचा ठपका त्यांच्यावर ठेवण्यात आला आहे.
निलंबित कर्मचाऱ्यांमध्ये फरासखाना पोलीस ठाण्यातील पोलीस अंमलदार शुभम विजय सुर्वे, तसेच वाहतूक शाखेतील पोलीस अंमलदार योगेश भागचंद्र एकशिंगे आणि अभिजीत अनिल शिंदे यांचा समावेश आहे. संबंधित आरोपीवर अनैतिक मानवी व्यापार प्रतिबंध कायद्यांतर्गत (PITA Act) गंभीर गुन्हा दाखल असल्याचे सांगण्यात आले आहे. त्यामुळे अशा व्यक्तीशी पोलिसांनी ठेवलेले संबंध वरिष्ठ अधिकाऱ्यांनी गांभीर्याने घेतले आहेत.
