मंचर : पत्नीला प्रसूतीसाठी माहेरी सोडून नातेवाइकाला भेटण्यासाठी निघालेल्या दोघांवर काळाने घाला घातला. पुणे-नाशिक महामार्गावरील मंचर बायपासच्या मोरडेवाडी हद्दीत भरधाव इको मोटारीवरील चालकाचे नियंत्रण सुटल्याने ती रस्त्यालगतच्या सुमारे 20 फूट खोल खड्ड्यात कोसळली. या भीषण अपघातात दोन नातेवाइकांचा मृत्यू झाला. आनंदराव शंकर कोळेकर (वय-53, रा. करंजविहिरे) आणि किरण बाबुराव डुंबरे (वय 35, रा. दावडी) अशी मृतांची नावे आहेत.
मिळालेल्या माहितीनुसार, किरण डुंबरे यांनी आपल्या पत्नीला प्रसूतीसाठी करंजविहिरे येथे माहेरी सोडले होते. त्यानंतर ते नातेवाईक आनंदराव कोळेकर यांच्यासोबत आळेफाटा येथे उपचार घेत असलेल्या एका नातेवाइकाला भेटण्यासाठी इको मोटारीने निघाले होते. त्यांची इको मोटार एमएच 14 एचडब्ल्यू 4327 क्रमांकाची होती.
मोरडेवाडी हद्दीत आल्यानंतर इको मोटारीवरील चालकाचे नियंत्रण अचानक सुटले. त्यानंतर मोटार रस्त्यालगतच्या सुमारे 20 फूट खोल खड्ड्यात जाऊन कोसळली. अपघात इतका भीषण होता की, मोटारीचा अक्षरशः चक्काचूर झाला. अपघाताची माहिती मिळताच विजय तांबडे, संतोष ढमाले यांच्यासह स्थानिक ग्रामस्थांनी घटनास्थळी धाव घेतली. जखमी अवस्थेतील दोघांना तातडीने मंचर उपजिल्हा रुग्णालयात दाखल करण्यात आले. मात्र, डॉक्टरांनी तपासणी केल्यानंतर उपचार सुरू होण्यापूर्वीच दोघांनाही मृत घोषित केले.
दरम्यान, पत्नीला प्रसूतीसाठी माहेरी सुखरूप सोडून काही वेळातच किरण डुंबरे यांच्यावर काळाने झडप घातली. कुटुंबीयांसाठी आनंदाचा क्षण जवळ आलेला असतानाच घडलेल्या या दुर्दैवी घटनेने दोन्ही कुटुंबांवर दुःखाचा डोंगर कोसळला असून परिसरात हळहळ व्यक्त होत आहे.
