उरुळी कांचन : ‘माझ्या बहिणीला पळवून नेल्यापासून तू माझ्या डोक्यात आहेस, तुला बघतोच’ अशी धमकी देत कौटुंबिक वादातून मेव्हण्याने जावयाला दगडाने मारहाण केल्याची घटना घडली. शिंदवणे (ता. हवेली) हद्दीतील शितोळे मळा परिसरात गुरुवारी (ता. 10) रात्री साडेसात वाजण्याच्या सुमारास राहत्या घरी घडली. याप्रकरणी पत्नीसह तिघांवर उरुळी कांचन पोलीस ठाण्यात गुन्हा दाखल करण्यात आला आहे.
मेव्हणा सुहास संतोष पवार, सासरे संतोष पवार (रा. दोघेही तुपे वस्ती, उरुळी कांचन, ता. हवेली) पत्नी ऋतुजा तुषार शितोळे ( रा. शितोळे मळा, शिंदवणे, ता. हवेली) असे गुन्हा दाखल करण्यात आलेल्या तिघांची नावे आहेत. याबाबत तरुण तुषार नाना शितोळे (वय-26, व्यवसाय शेती, रा. शितोळे मळा, शिंदवणे, ता. हवेली, जि. पुणे) यांनी उरुळी कांचन पोलीस ठाण्यात फिर्याद दिली.
पोलिसांनी दिलेल्या माहितीनुसार, फिर्यादी तुषार शितोळे आणि त्यांची पत्नी ऋतुजा यांच्यात घरगुती कारणावरून वाद झाला होता. या वादाची माहिती तुषार यांचा मेव्हणा सुहास पवार यांना झाली होती. त्यामुळे तेथे आल्यानंतर सुहास याने तुषार यांच्या वडिलांची कॉलर पकडून त्यांना अर्वाच्य भाषेत शिवीगाळ करण्यास सुरुवात केली.
शिवीगाळ होत असल्याचे पाहून तुषार यांची आई मनीषा या मध्यस्थी करण्यासाठी धावून आल्या असता, सुहासने त्यांनाही रागाच्या भरात जोरात ढकलून दिले. यावेळी फिर्यादी यांनी मेव्हणा सुहास याला म्हटले कि “तू आमच्या घरात भांडण कशाला करतोस?” असे विचारले असता “तू माझ्या बहिणीला पळवून नेल्यापासूनच माझ्या डोक्यात आहेस, तुझ्याकडे आता बघतोच!” असे म्हणून अर्वाच्य भाषेत शिवीगाळ करत एक मोठा दगड उचलून थेट तुषारच्या डोक्यात हाणला. असे फिर्यादीत म्हटले आहे.
दरम्यान, दगड लागल्याने तुषार खाली कोसळले. ते खाली पडलेले असतानाही त्यांची पत्नी ऋतुजा आणि मेव्हणा सुहास या दोघांनी त्यांना लाथाबुक्क्यांनी अमानुष मारहाण केली. तसेच तुषार यांचे सासरे संतोष पवार यांनी मोबाईलवरून शिवीगाळ करत जीवे मारण्याची धमकी दिली असल्याचे फिर्यादीत म्हटले आहे. तपास पोलीस हवालदार पवार करीत आहेत.
