दौंड : दौंड तालुक्यातील शिरापूर येथे एका ज्येष्ठ शेतकऱ्याच्या शेतजमिनीबाबत धक्कादायक प्रकार समोर आला आहे. मूळ जमीनमालकाच्या जागी दुसऱ्या व्यक्तीला उभे करून जमीन खरेदीखत केल्याचा आरोप करण्यात आला आहे. या प्रकरणामागे मोठ्या एजंट टोळीचा सहभाग असण्याची शक्यता व्यक्त होत असून, या घटनेची तालुक्यात चर्चा सुरू आहे.
मिळालेल्या माहितीनुसार, 27 मे 2026 रोजी दौंड येथील दुय्यम निबंधक कार्यालय, श्रेणी 1 येथे शिरापूरमधील संबंधित जमिनीचे खरेदीखत करण्यात आले. तक्रारीनुसार, जमीन विक्री करणाऱ्या मूळ शेतकऱ्याऐवजी एका बनावट व्यक्तीला कार्यालयात आणण्यात आले. ही व्यक्तीच मूळ जमीनमालक असल्याचे भासवून दस्त नोंदणीची प्रक्रिया पूर्ण करण्यात आल्याचा आरोप आहे.
या व्यवहारात दस्त करून घेणारे, साक्षीदार आणि कथित बनावट व्यक्ती यांच्यात संगनमत असल्याचा संशय तक्रारीत व्यक्त करण्यात आला आहे. तसेच संबंधित अधिकाऱ्यांच्या भूमिकेबाबतही प्रश्न उपस्थित करण्यात आले आहेत. या संपूर्ण प्रकरणाची चौकशी करून दोषी आढळणाऱ्या व्यक्तींवर नोंदणी अधिनियम 1908 मधील कलम 82 अंतर्गत फौजदारी कारवाई करावी, अशी मागणी करण्यात आली आहे.
दरम्यान, दौंड दुय्यम निबंधक श्रेणी-1चे अधिकारी एस. डी. भोसले यांनी या प्रकरणासंदर्भात तक्रार दाखल झाल्याची माहिती दिली. त्यानंतर संबंधित पक्षकारांसह वादी आणि प्रतिवादींचे म्हणणे ऐकून घेण्यात आले. संपूर्ण प्रकरणाचा अहवाल पुढील कार्यवाहीसाठी वरिष्ठ कार्यालयाकडे सादर करण्यात आला आहे. वरिष्ठ अधिकाऱ्यांकडून या प्रकरणाची पाहणी करून नियमानुसार पुढील निर्णय घेतला जाईल, असे भोसले यांनी सांगितले.
