पोपट पाचंगे

रांजणगाव गणपती/प्रतिनिधी : मलठण (ता.शिरूर) येथील सचिन नंदकुमार बोडरे (वय ३८) यांचा सोनेसांगवी परिसरात अष्टविनायक महामार्गावर झालेल्या भीषण अपघातात दुर्दैवी मृत्यू झाला. समोरून येणाऱ्या अज्ञात दुचाकीस्वाराला वाचविण्याच्या प्रयत्नात पिकअप जीप अचानक उलटल्याने हा अपघात घडला. या घटनेमुळे मलठण परिसरात हळहळ व्यक्त होत आहे.
याबाबत किसन ज्ञानदेव दंडवते यांनी रांजणगाव एमआयडीसी पोलिस ठाण्यात दिलेल्या फिर्यादीनुसार,बोडरे हे महिंद्रा कंपनीची पिकअप जीप (क्र. एमएच १२ यूएम ९९९८) घेऊन रांजणगाव गणपती येथून सोनेसांगवीच्या दिशेने घेऊन जात होते.बुधवारी (दि.१८ नोव्हेंबर) दुपारी तीन वाजण्याच्या सुमारास रांजणगाव गणपती ते सोनेसांगवी रस्त्यावर राजनंदिनी हॉटेलजवळ समोरून येणारा अज्ञात दुचाकीस्वार अचानक आडवा आला. त्याला वाचविण्याचा प्रयत्न करत असताना पिकअप जीप रस्त्यावर उलटली.

या अपघातात बोडरे हे जीपखाली सापडले. त्यांच्या डोक्याला, हातापायांना गंभीर दुखापत झाली. त्यांना उपचारासाठी शिरूर येथील सरकारी दवाखान्यात नेण्यात आले; मात्र डॉक्टरांनी उपचारापूर्वीच त्यांचा मृत्यू झाल्याचे घोषित केले.
याप्रकरणी रांजणगाव एमआयडीसी पोलीस ठाण्यात अज्ञात दुचाकीस्वाराविरोधात फिर्याद दाखल करण्यात आली आहे. दरम्यान,बोडरे यांच्या अपघाती निधनाने मलठण गावावर शोककळा पसरली असून, परिसरातून हळहळ व्यक्त होत आहे.







