अक्षय टेमगिरे
शिरूर: शिरूर तालुक्यातील मांडवगण फराटा येथील आनंद हॉस्पिटलमध्ये उपचारासाठी आलेल्या एका रुग्णाची अचानक प्रकृती बिघडली. रुग्ण बेशुद्ध पडल्याने काही क्षणांसाठी हॉस्पिटलमध्ये धावपळ उडाली होती.
मात्र, प्रसंगाचे गांभीर्य ओळखत डॉ. अतुल सुराणा यांनी कोणताही विलंब न करता तात्काळ CPR (Cardiopulmonary Resuscitation) सुरू केले. वेळेवर आणि योग्य पद्धतीने करण्यात आलेल्या CPR मुळे रुग्णाला पुन्हा श्वासोच्छ्वास मिळू लागला आणि त्याची प्रकृती स्थिर करण्यात डॉक्टरांना यश आले आहे.
प्राथमिक उपचारांनंतर पुढील विशेष उपचारांसाठी संबंधित रुग्णाला बारामती येथील रुग्णालयात हलविण्यात आले. या संपूर्ण घटनेचे चित्रीकरण हॉस्पिटलमधील CCTV कॅमेऱ्यात कैद झाले आहे. या व्हिडिओमध्ये डॉ. अतुल सुराणा यांनी दाखवलेली तत्परता, प्रसंगावधान आणि आपत्कालीन परिस्थितीत घेतलेला जलद निर्णय स्पष्टपणे दिसून येत असल्याने त्यांच्या कार्याचे सर्व स्तरांतून कौतुक होत आहे.
पहा व्हिडीओ:
View this post on Instagram
वैद्यकीय क्षेत्रातील तज्ज्ञांच्या मते, हृदयविकाराचा झटका किंवा अचानक हृदयक्रिया बंद पडल्यास पहिल्या काही मिनिटांत योग्य पद्धतीने दिलेले CPR रुग्णाचा जीव वाचविण्यास अत्यंत महत्त्वाचे ठरते. मांडवगण फराटा येथील ही घटना त्याचाच प्रत्यय देणारी ठरली आहे.
ग्रामीण भागातही आधुनिक वैद्यकीय सुविधा, प्रशिक्षित डॉक्टर आणि आपत्कालीन परिस्थितीत तातडीने दिलेले उपचार यामुळे अनेकांचे प्राण वाचू शकतात, असा विश्वास या घटनेमुळे अधिक दृढ झाला आहे.
डॉ. अतुल सुराणा यांनी दाखवलेल्या तत्परतेबद्दल नागरिकांनी त्यांचे अभिनंदन केले असून, ही घटना इतरांसाठीही प्रेरणादायी असल्याची भावना व्यक्त केली आहे.
