यवत, (पुणे) : दारू पिण्यासाठी टेम्पो चालकाने पैसे न दिल्याने दोन दुचाकीस्वारांनी चालकाला व त्याच्या मालकाला लाथाबुक्क्यांनी आणि दगडाने अमानुष मारहाण केल्याची घटना घडली. तसेच खिशातील 1500 रुपयांची रोकड बळजबरीने चोरून नेल्याचा प्रकार घडला. रविवारी (ता. 24) रात्री साडेनऊ वाजण्याच्या सुमारास पाटस (ता. दौंड) गावचे हद्दीत जुना दौंड रोडचे डोंगरेश्वर चौकात हि घटना घडली. याप्रकरणी दोघांवर यवत पोलीस ठाण्यात गुन्हा दाखल करण्यात आला आहे.
भाऊसाहेब ज्ञानदेव गावडे (वय ४२, व्यवसाय- ड्रायव्हर, रा. बेटवाडी, ता. दौंड) असे मारहाण झालेल्या टेम्पोचालकाचे नाव आहे. तर सुनिल सुरेश पौळ, रा. डोंगरेश्वर दौंड) व अनोळखी इसम नाव पत्ता माहित नाही) असे मारहाण करून पैसे लुटणाऱ्या दोघांची नावे आहेत. याबाबत गावडे यांनी दिलेल्या तक्रारीवरून दोन्ही आरोपींवर गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी गावडे आपल्या ताब्यातील टेम्पो घेऊन जुन्या दौंड रोडने पाटस गावच्या हद्दीतून चालले होते. ते डोंगरेश्वर चौकात आले असता, आरोपी सुनिल पौळ आणि त्याच्यासोबत असलेल्या एका अनोळखी इसमाने आपली ‘स्प्लेंडर’ मोटरसायकल फिर्यादीच्या टेम्पोसमोर आडवी लावली. टेम्पो थांबताच दोघेही चालक भाऊसाहेब यांच्याजवळ आले आणि थेट “आम्हाला दारू पिण्यासाठी पैसे दे,” अशी मागणी करू लागले.
फिर्यादी ड्रायव्हरने दारूसाठी पैसे देण्यास नकार दिला. पैसे न दिल्याने आरोपींनी शिवीगाळ करत भाऊसाहेब यांना लाथाबुक्क्यांनी मारहाण करण्यास सुरुवात केली. एवढ्यावरच न थांबता आरोपींनी फिर्यादीच्या शर्टच्या खिशात जबरदस्तीने हात घालून आतील 1500 रुपयांची रोख रक्कम हिसकावून घेतली.
दरम्यान, टेम्पोचे मालक मध्यस्थी करण्यासाठी पुढे आले असता, आरोपींनी त्यांना आणि ड्रायव्हर दोघांनाही रस्त्यावरील दगडाने मारहाण करून गंभीर दुखापत केली. शिवीगाळ करून आरोपी आपल्या मोटरसायकलवरून अंधाराचा फायदा घेत पसार झाले. त्यानुसार यवत पोलीस ठाण्यात गुन्हा दाखल करण्यात आला आहे. तपास पोलीस हवालदार बंडगर करीत आहेत.
