पुणे : मोबाईलमधील महत्त्वाची माहिती चुकून डिलिट झाल्याच्या कारणावरून व्हिडिओ एडिटरला मारहाण केल्याची घटना पुण्यातील बुधवार पेठ आणि नारायण पेठ परिसरात घडली. या प्रकरणी फरासखाना पोलीस ठाण्यात गुन्हा दाखल करण्यात आला आहे. पोलिसांनी आरोपीला अटक केली होती. त्यानंतर त्याची जामिनावर सुटका झाली आहे.
पोलिसांनी दिलेल्या माहितीनुसार, तक्रारदार क्षितिज सागर पवार हे व्हिडिओ एडिटिंगचे काम करतात. गणेशोत्सवाच्या आधी त्यांनी पृथ्वीराज गजानन पंडित यांचे काही व्हिडिओ एडिट करून दिले होते. त्यानंतर 28 सप्टेंबर रोजी पंडित यांनी पवार यांना भेटण्यासाठी बोलावले. त्यांच्याकडे आणखी एका व्हिडिओचे एडिटिंगचे काम देण्यात आले.
व्हिडिओचे काम करत असताना पवार यांच्या हातून चुकून पंडित यांच्या मोबाईलमधील माहिती पूर्णपणे डिलिट झाली. मोबाईलमधील डेटा नष्ट झाल्याचे लक्षात आल्यानंतर पवार घाबरले. त्यांनी मोबाईल पंडित यांच्याकडे परत दिला आणि ते तेथून निघून गेले.
या घटनेनंतर दुसऱ्या दिवशी म्हणजेच 29 सप्टेंबर रोजी दुपारी साडेबारा वाजण्याच्या सुमारास पंडित हे पवार यांच्या घरी गेले. मोबाईलमधील माहिती डिलिट झाल्याच्या कारणावरून दोघांमध्ये वाद झाला. यावेळी पंडित यांनी तांब्याच्या बाटलीने तसेच लाथाबुक्क्यांनी मारहाण केल्याचा आरोप तक्रारीत करण्यात आला आहे.
यानंतर मोबाईलमधील डिलिट झालेली माहिती परत मिळवण्याचा प्रयत्न करण्यात आला. त्यासाठी दोघे एका दुकानात गेले. मात्र, प्रयत्न करूनही मोबाईलमधील माहिती पूर्ववत करता आली नाही. त्यामुळे पुन्हा वाद निर्माण झाला. त्यानंतर पत्या मारुती चौक परिसरात पवार यांना बांबूने मारहाण करण्यात आल्याचे तक्रारीत नमूद आहे.
या प्रकरणी तक्रार मिळाल्यानंतर फरासखाना पोलिसांनी गुन्हा दाखल करून आरोपीवर कारवाई केली. अटकेनंतर आरोपीची जामिनावर सुटका झाली असून, या संपूर्ण घटनेचा पुढील तपास फरासखाना पोलीस करत आहेत.
