पुणे : शेअर बाजारात तब्बल ४०० टक्के नफा मिळवून देण्याचे आमिष दाखवून नऱ्हे परिसरातील एका ४१ वर्षीय महिलेची ३२ लाख ३० हजार रुपयांची ऑनलाइन फसवणूक झाल्याचा प्रकार समोर आला आहे. सोशल मीडियावरील शेअर ट्रेडिंगच्या जाहिरातीवर क्लिक केल्यानंतर महिलेला एका खासगी ग्रुपमध्ये सहभागी करून घेण्यात आले. त्यानंतर बनावट ॲपच्या माध्यमातून गुंतवणूक करण्यास प्रवृत्त केल्याचा आरोप आहे. या प्रकरणी नऱ्हे पोलीस ठाण्यात तक्रार दाखल करण्यात आली आहे.
पोलिसांकडे दाखल तक्रारीनुसार, संबंधित महिला नऱ्हे येथील गोल्ड अंबर सोसायटीमध्ये राहते. तिने सोशल मीडियावर शेअर ट्रेडिंगसंदर्भातील जाहिरात पाहिली होती. या जाहिरातीत गुंतवणुकीवर मोठा परतावा मिळण्याचे आमिष दाखवण्यात आले होते. त्यावर क्लिक केल्यानंतर महिलेला ‘मीना राजपूत’ नावाच्या संशयित महिलेने एका खासगी सोशल मीडिया ग्रुपमध्ये सहभागी करून घेतल्याचे तक्रारीत म्हटले आहे.
या ग्रुपच्या माध्यमातून शेअर बाजार आणि आयपीओमध्ये गुंतवणूक केल्यास कमी कालावधीत भरघोस नफा मिळू शकतो, असा विश्वास महिलेला देण्यात आला. त्यानंतर तिला एका विशिष्ट ॲपच्या माध्यमातून पैसे गुंतवण्यास सांगण्यात आले.
मोठ्या परताव्याच्या आशेने महिलेने टप्प्याटप्प्याने एकूण ३२ लाख ३० हजार रुपये संबंधित ॲपमध्ये गुंतवल्याचे तक्रारीत नमूद आहे. मात्र, एवढी मोठी रक्कम गुंतवूनही तिला अपेक्षित परतावा मिळाला नाही. त्यानंतर आपली फसवणूक झाल्याचा संशय आल्याने महिलेने पोलिसांकडे धाव घेतली.
या प्रकरणी नऱ्हे पोलिसांनी गुन्हा दाखल केला असून, ‘मीना राजपूत’ या नावाने संपर्क साधणाऱ्या व्यक्तीमागे कोण आहे, याचा तपास सुरू आहे. या कथित सायबर फसवणुकीत आणखी कोणाचा सहभाग आहे आणि पैशांचा व्यवहार कुठे झाला, याचीही चौकशी केली जात आहे.
शेअर बाजारात कमी कालावधीत अव्वाच्या सव्वा नफा मिळवून देण्याचे आश्वासन देणाऱ्या जाहिराती आणि अनोळखी गुंतवणूक ॲप्सबाबत सावध राहणे आवश्यक आहे. गुंतवणूक करण्यापूर्वी संबंधित संस्था आणि ॲपची विश्वासार्हता तपासणे गरजेचे आहे. या प्रकरणाचा पुढील तपास पोलीस करीत आहेत.
