उरुळी कांचन, (पुणे) : उरुळी कांचन-भवरापूर रस्त्यावर अंधारात कोणतेही रिफ्लेक्टर न लावता धोकादायक पद्धतीने उभ्या केलेल्या उसाच्या ट्रॅक्टर ट्रॉलीला दुचाकीची पाठीमागून जोरदार धडक बसली. या भीषण अपघातात दुचाकीस्वार दीपक बाळू कांचन (वय 40, रा. शिंदवणे, काळेशिवार, कांचनवस्ती, ता. हवेली) यांचा मृत्यू झाला. गुरुवारी (ता. 12) सायंकाळी पाऊणे आठ वाजण्याच्या सुमारास भवरापूर गावच्या हद्दीत, कोरेगाव मूळ फाट्याजवळ ही घटना घडली.
याप्रकरणी मृताचे चुलत भाऊ पंकज हनुमंत कांचन (वय 23, रा. शिंदवणे) यांनी उरुळी कांचन पोलीस ठाण्यात फिर्याद दिली आहे. त्यानुसार ट्रॅक्टर ट्रॉली चालक ऋषिकेश शंकर सातव (रा. भवरापूर, ता. हवेली) याच्याविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, दीपक कांचन हे लोणी काळभोर येथील एमआयटी संस्थेच्या स्विमिंग पूलच्या देखभालीचे काम करीत होते. 12 नोव्हेंबर रोजी सायंकाळी ते दुचाकीवरून (एमएच 42 बीक्यू 2629) जात असताना भवरापूरच्या दिशेने जाणारी उसाने भरलेली ट्रॅक्टर ट्रॉली रस्त्यावर धोकादायक पद्धतीने उभी होती. ट्रॉलीच्या मागील बाजूस कोणतेही रिफ्लेक्टर लावण्यात आले नव्हते. अंधारात ट्रॉलीचा अंदाज न आल्याने दीपक यांच्या दुचाकीची पाठीमागून जोरदार धडक बसली.
धडकेमुळे दीपक रस्त्यावर पडले. त्यांच्या डोक्याला गंभीर दुखापत झाली आणि ते बेशुद्ध अवस्थेत होते. घटनेची माहिती मिळताच त्यांचे चुलत भाऊ पंकज कांचन आणि नातेवाईक घटनास्थळी दाखल झाले. त्यांनी दीपक यांना खासगी रुग्णवाहिकेतून उरुळी कांचन येथील सिद्धिविनायक रुग्णालयात दाखल केले. मात्र, डॉक्टरांनी तपासणीअंती त्यांना उपचारापूर्वीच मृत घोषित केले. अपघातानंतर ट्रॅक्टर ट्रॉली चालक ट्रॉली घटनास्थळी सोडून निघून गेल्याचे फिर्यादीत नमूद करण्यात आले आहे. चौकशीदरम्यान ट्रॉली ऋषिकेश सातव याची असल्याचे समोर आले.
दरम्यान, रात्रीच्या वेळी रस्त्यावर उसाने भरलेल्या ट्रॉली उभ्या करताना रिफ्लेक्टर किंवा इतर सुरक्षा उपाय न केल्याने वाहनचालकांच्या जीवाला धोका निर्माण होत असल्याचा प्रश्न या घटनेमुळे पुन्हा ऐरणीवर आला आहे. या प्रकरणी उरुळी कांचन पोलिसांत गुन्हा दाखल करण्यात आला असून, पोलीस हवालदार चौधर पुढील तपास करीत आहेत.
