इम्रान अत्तार
पुणे : भोर नगर परिषदेच्या प्रशासकीय इमारतीतील अध्यक्ष आणि उपाध्यक्ष यांची दालने तात्काळ प्रभावाने सील करण्याचे आदेश मुख्याधिकाऱ्यांनी दिले आहेत. शासकीय अभिलेख, कागदपत्रे आणि इतर मालमत्तेची सुरक्षितता तसेच प्रशासकीय हित लक्षात घेऊन हा निर्णय घेण्यात आला आहे.
१७ जुलै २०२६ रोजी जारी करण्यात आलेल्या कार्यालयीन आदेशानुसार, संबंधित दालने ही भोर नगर परिषदेची शासकीय मालमत्ता असल्याने त्यामधील अभिलेख, साहित्य आणि इतर शासकीय वस्तूंचे संरक्षण करणे आवश्यक असल्याचे नमूद करण्यात आले आहे. महाराष्ट्र नगर परिषद, नगर पंचायती व औद्योगिक नगर अधिनियम, १९६५ अंतर्गत मुख्याधिकाऱ्यांना प्राप्त अधिकारांचा वापर करून ही कारवाई करण्यात आली आहे.
आदेशानुसार, दालने सील करण्यापूर्वी त्यामधील सर्व अभिलेख, साहित्य आणि इतर शासकीय मालमत्तेची सविस्तर नोंद घेऊन पंचनामा तयार करण्याचे निर्देश देण्यात आले आहेत. ही संपूर्ण प्रक्रिया संबंधित शाखा प्रमुख, कार्यालय अधीक्षक, सुरक्षा कर्मचारी तसेच आवश्यक अधिकारी आणि कर्मचाऱ्यांच्या उपस्थितीत नियमानुसार पार पाडण्यास सांगण्यात आले आहे.
याशिवाय, कारवाई पूर्ण झाल्यानंतर पंचनामा, छायाचित्रे आणि कार्यवाहीचा सविस्तर अहवाल तातडीने मुख्याधिकारी कार्यालयात सादर करण्याचे निर्देशही आदेशात देण्यात आले आहेत.
दरम्यान, या आदेशाची तात्काळ अंमलबजावणी करण्यास संबंधित विभागांना सांगण्यात आले असून कार्यालय अधीक्षक, शाखा प्रमुख आणि सुरक्षा विभागाला आवश्यक ती कार्यवाही करण्याच्या सूचना देण्यात आल्या आहेत.
