लोणी काळभोर, ता. 10 : थेऊर (ता. हवेली) येथील दळवीवस्ती परिसरातून 30 वर्षीय तरुण बेपत्ता झाल्याची घटना समोर आली आहे. सनि विलास जाधव असे या तरुणाचे नाव असून, तो 5 ऑक्टोबर रोजी सायंकाळी घरातून कोणालाही काही न सांगता बाहेर पडला. त्यानंतर तो घरी परतला नसल्याने कुटुंबीयांनी त्याचा सर्वत्र शोध घेतला. मात्र, तो मिळून न आल्याने त्याच्या वडिलांनी लोणी काळभोर पोलीस ठाण्यात धाव घेत अज्ञात व्यक्तीविरुद्ध अपहरणाची तक्रार दिली आहे.
पोलिसांकडे दिलेल्या माहितीनुसार, सनि जाधव हा रिक्षा चालवून कुटुंबाचा उदरनिर्वाह करतो. सुमारे महिनाभरापूर्वी त्याचा पत्नीशी घरगुती कारणावरून वाद झाला होता. त्यानंतर त्याची पत्नी माहेरी मुंबई येथे गेली होती. सुमारे 15 दिवसांनंतर सनि हा थेऊर येथील दळवीवस्ती परिसरात राहणारे त्याचे मामा संतोष कवले यांच्याकडे राहण्यासाठी गेला होता.
5 ऑक्टोबर रोजी सायंकाळी चारच्या सुमारास जेवण झाल्यानंतर सनि कोणालाही काही न सांगता घरातून निघून गेला. बराच वेळ होऊनही तो परत न आल्याने त्याच्या मामाने कुटुंबीयांना फोन करून याबाबत माहिती दिली. त्यानंतर नातेवाईकांनी परिसरात तसेच परिचितांकडे त्याचा शोध घेतला; मात्र त्याचा ठावठिकाणा लागला नाही.
अखेर मुलाचे अपहरण झाल्याची शक्यता व्यक्त करत वडील विलास जाधव यांनी पोलिसांत तक्रार दाखल केली. या तक्रारीच्या आधारे पोलिसांकडून पुढील तपास व शोधाची कार्यवाही करण्यात येत आहे. मात्र, तरुणाचे नेमके काय झाले, तो कुठे गेला आणि त्याच्या बेपत्ता होण्यामागे काय कारण आहे, याबाबत अद्याप स्पष्टता नाही. सनि जाधव यांच्याबाबत कोणाला काही माहिती मिळाल्यास लोणी काळभोर पोलिसांशी किंवा त्यांच्या कुटुंबीयांशी संपर्क साधावा, असे आवाहन करण्यात येत आहे.
