लोणी काळभोर, ता. 14 : अकलूज येथून पुण्यातील कोंढवा परिसरात कत्तलीसाठी म्हशी घेऊन जाणाऱ्या आयशर टेम्पोला गोसेवा संघाच्या कार्यकर्त्यांनी थेऊर फाटा येथे अडविले. या टेम्पोमध्ये दाटीवाटीने बांधलेल्या आणि चारा-पाण्याची व्यवस्था नसलेल्या नऊ म्हशी आढळून आल्या. या प्रकरणी टेम्पोचालकाला लोणी काळभोर पोलिसांनी ताब्यात घेतले असून, नऊ म्हशींची सुटका करण्यात आली आहे.
सोहेल मोहम्मद कुरेशी (वय 23, रा. मोरवडी, पिंपरी) व इरशाद जाकीर कुरेशी अशी गुन्हा दाखल करण्यात आलेल्यांची नावे आहेट. याप्रकरणी कदमवाकवस्ती येथील देवयाणी दिलीप लोणे (वय ३०) यांनी लोणी काळभोर पोलीस ठाण्यात तक्रार दिली आहे. ही घटना ९ नोव्हेंबर रोजी दुपारी सुमारे साडे तीन वाजण्याच्या सुमारास पुणे-सोलापूर महामार्गावरील थेऊर फाटा येथे घडली.
पोलिसांनी दिलेल्या माहितीनुसार, देवयाणी लोणे या अखिल भारतीय कृषी गोसेवा संघ, समस्त हिंदू आघाडीच्या कार्यकर्त्या म्हणून काम करतात. 9 नोव्हेंबर रोजी त्या काष्टी (ता. श्रीगोंदा) येथे असताना त्यांना एका आयशर टेम्पोमधून जनावरे कत्तलीसाठी पुण्यातील कोंढवा येथे नेण्यात येत असल्याची गोपनीय माहिती मिळाली. त्यानंतर त्यांनी मित्र ईश्वर राजकुमार कट्टे यांच्यासह पाटस येथे येऊन संबंधित वाहनाचा शोध सुरू केला.
सोरतापवाडी परिसरात संशयित आयशर टेम्पो (क्र. एमएच 09 सीयू 4374) दिसल्यानंतर कार्यकर्त्यांनी त्याचा पाठलाग केला. थेऊर फाटा येथे टेम्पो अडवून चालकाकडे चौकशी केली असता, त्याने आपले नाव सोहेल कुरेशी असल्याचे सांगितले. जनावरे अकलूज येथून आणून कोंढवा येथे नेत असल्याची माहिती त्याने दिली.
यानंतर कार्यकर्त्यांनी 112 क्रमांकावर संपर्क साधून पोलिसांना माहिती दिली. पोलिसांच्या मदतीने टेम्पो लोणी काळभोर पोलीस ठाण्यात आणण्यात आला. वाहनाची तपासणी केली असता, त्यामध्ये नऊ काळ्या रंगाच्या म्हशी दोरीने घट्ट बांधलेल्या अवस्थेत आढळल्या. त्यांना चारा-पाण्याची कोणतीही व्यवस्था नसल्याचे तक्रारीत नमूद करण्यात आले आहे.
सदर म्हशी अकलूज बाजारातून इरशाद जाकीर कुरेशी याने खरेदी केल्याचे चालकाने सांगितले. त्यासंदर्भातील खरेदीच्या पावत्याही दाखविण्यात आल्याचे तक्रारीत म्हटले आहे. मात्र, जनावरांची दाटीवाटीने आणि कथित कत्तलीच्या उद्देशाने वाहतूक होत असल्याचा संशय व्यक्त करत देवयाणी लोणे यांनी संबंधितांविरोधात लोणी काळभोर पोलिस ठाण्यात फिर्याद दिली आहे. त्यानुसार दोघांवर प्राण्‍यांचा छळ प्रतिबंधक अधिनियम, 1960 – 11(1)(a),11(1)(d),11(1)(e),11(1)(f) प्रमाणे गुन्हा दाखल करण्यात आला आहे.
