राहुलकुमार अवचट
यवत: दौंड तालुक्यातील वरवंड येथील प्राथमिक आरोग्य केंद्राचे ३० खाटांच्या अत्याधुनिक ग्रामीण रुग्णालयामध्ये श्रेणी वर्धन करण्याच्या कामाला राज्य शासनाकडून मंजुरी मिळाली असून या महत्त्वाकांक्षी प्रकल्पाचे प्रत्यक्ष बांधकाम जोरदार सुरू आहे. सुमारे ३० कोटी रुपये खर्चाच्या या रुग्णालय इमारत आणि अधिकारी – कर्मचाऱ्यांच्या निवासस्थानांच्या कामाची आमदार राहुल कुल यांनी आज प्रत्यक्ष वरवंड येथे भेट देऊन पाहणी केली.
ग्रामीण भागातील नागरिकांना जवळच्या परिसरात दर्जेदार आणि उच्च दर्जाच्या वैद्यकीय सुविधा उपलब्ध करून देणे हे आपले सर्वोच्च प्राधान्य असल्याचे यावेळी आमदार राहुल कुल यांनी स्पष्ट केले. वरवंड व पंचक्रोशीतील गावांमधील नागरिकांना उपचारासाठी यापुढे दूरवर जावे लागणार नाही, यादृष्टीने हे रुग्णालय अत्यंत वरदान ठरणार आहे.
कामाच्या पाहणीदरम्यान आमदार कुल यांनी उपस्थित संबंधित शासकीय अधिकारी, अभियंता व कंत्राटदारांची बैठक घेऊन सक्त सूचना दिल्या असून बांधकामाचा दर्जा चांगला राखला जावा आणि हा संपूर्ण प्रकल्प निश्चित केलेल्या कालमर्यादेत (वेळेत) पूर्ण करावा, असे स्पष्ट निर्देश आमदार राहुल कुल यांनी यावेळी दिले. कामाच्या गुणवत्तेबाबत व वेळेबाबत कोणतीही कसूर खपवून घेतली जाणार नाही, असा इशाराही त्यांनी दिला.
या अत्याधुनिक ग्रामीण रुग्णालयामुळे दौंड तालुक्याच्या ग्रामीण भागातील आरोग्य यंत्रणेला आणखी मोठे बळ मिळणार असून, लवकरच हे रुग्णालय सेवेत रुजू झाल्यावर वरवंड परिसरातील आरोग्यसेवेचा चेहरामोहरा बदलणार आहे.
