पुणे : दिवाळीच्या सुटीत शहरातील विकासकामे सुरू ठेवण्यासाठी पुणे महापालिकेने कडक नियमावली लागू केली आहे. सुटीच्या काळात मजूर गावी जात असल्याने अपुऱ्या कर्मचाऱ्यांवर कामे उरकताना दुर्घटना घडू नयेत, यासाठी शहर अभियंता अनिरुद्ध पावसकर यांनी हे निर्देश दिले आहेत. या नियमांचे पालन न केल्यास कडक कायदेशीर कारवाई केली जाईल, असा इशारा देण्यात आला आहे.
शहरात सध्या रस्ते, पूल, इमारती आणि इतर पायाभूत सुविधांची अनेक कामे सुरू आहेत. सणासुदीच्या दिवसांत कामगारांची कमतरता भासते, तसेच साहित्य आणि सुरक्षा साधनांची वानवा असते. अशा स्थितीत धोकादायक पद्धतीने कामे सुरू ठेवू नयेत, यासाठी प्रशासनाने 16 अटींचे पालन करणे बंधनकारक केले आहे.
नवीन आदेशानुसार, प्रत्येक बांधकाम स्थळाची दिवाळीपूर्वी प्रत्यक्ष पाहणी करण्याचे आदेश कनिष्ठ, उप आणि कार्यकारी अभियंत्यांना देण्यात आले आहेत. साइटवर योग्य बॅरिकेडिंग करणे, वाहन आणि नागरिकांसाठी सुरक्षित मार्ग तयार करणे, खड्डे व्यवस्थित झाकणे तसेच रात्रीच्या वेळी पुरेशी प्रकाशव्यवस्था आणि ब्लिंकर बसवणे आवश्यक आहे. कामगारांसाठी हेल्मेट, सेफ्टी शूज, सेफ्टी बेल्ट आणि जॅकेट यांसारखी सर्व सुरक्षा साधने देणे अनिवार्य करण्यात आले आहे.
प्रत्येक ठिकाणी जबाबदार पर्यवेक्षक असणे गरजेचे आहे. जर आवश्यक मनुष्यबळ किंवा सुरक्षा साहित्य उपलब्ध नसेल, तर काम तातडीने थांबवून ती जागा सुरक्षित करण्याचे निर्देश दिले आहेत. महापालिकेच्या या सर्व अटींची पूर्तता केल्याशिवाय कामांना परवानगी मिळणार नाही. नियमांकडे दुर्लक्ष करून काम सुरू ठेवले आणि एखादा अपघात घडल्यास, त्याची संपूर्ण कायदेशीर जबाबदारी संबंधित कंत्राटदार आणि महापालिकेच्या संबधित अधिकाऱ्यांवर राहील, असे स्पष्ट करण्यात आले आहे
